Kryeministri izraelit, Benjamin Netanyahu, ka lënë të kuptohet se do të ndërmarrë veprime më të gjera ushtarake në Gaza.
Megjithatë, mediat izraelite raportojnë për mosmarrëveshje të forta mes tij dhe shefit të ushtrisë, Eyal Zamir, lidhur me mënyrën e veprimit në këtë luftë.
Sipas raportimeve që citojnë zyrtarë anonimë nga zyra e kryeministrit, Netanyahu po e shtyn ushtrinë — e cila aktualisht kontrollon rreth tre të katërtat e territorit të Gazës — që të pushtojë të gjithë zonën.
Por Zamir, thuhet se kundërshton këtë plan dhe, nëse ai miratohet, mund të japë dorëheqjen ose të largohet me presion, sipas The Times of Israel.
Zamir ka pasur përplasje të vazhdueshme edhe me anëtarë të kabinetit, por ai nuk është i vetmi që shpreh kundërshtime.
Edhe Yoram Cohen, ish-kreu i agjencisë së sigurisë izraelite Shin Bet, ka kritikuar qasjen e Netanyahut, duke i quajtur objektivat e tij në Gaza si “një fantazi”.
“Nëse dikush imagjinon se mund të arrijmë çdo terrorist, çdo tunel dhe çdo armë, dhe njëkohësisht t’i kthejmë pengjet tona në shtëpi – mendoj se është e pamundur”, deklaroi ai.
