Portieri i PSG-së, Gianluigi Donnarumma, ka reaguar pas episodit të ndodhur gjatë çerekfinales së Kupës së Botës për Klube ndaj Bayern Munich, ku një përplasje e tij me Jamal Musialën përfundoi me dëmtimin e rëndë të talentit gjerman.
Italiani u kritikua ashpër në rrjetet sociale dhe nga mediat për mënyrën e ndërhyrjes, ndërsa portieri bavarez, Manuel Neuer, e cilësoi atë si një veprim “të panevojshëm dhe të nxituar”. Ndërkohë, Donnarumma, në një deklaratë për La Gazzetta dello Sport, theksoi se nuk kishte asnjë qëllim ta dëmtonte kundërshtarin:
“Jam shumë i tronditur nga ajo që ndodhi. Padyshim që nuk ishte qëllimi im të dëmtoja Musialën”, tha portieri i kombëtares italiane.
Menaxheri i tij, Vincenzo Raiola, doli në mbështetje të Donnarummës duke thënë se episodi ishte thjesht një çështje sekondash.
Gigio ishte i pari që arriti te topi dhe nuk mundi ta shmangte më ndërhyrjen. Është e padrejtë të mendohet se ai e bëri me qëllim. I urojmë Musialës një rikuperim sa më të shpejtë”, deklaroi Raiola.
Pamjet televizive treguan një Donnarumma të çorientuar pas episodit, që u largua nga fusha i prekur emocionalisht. Agjenti i tij shtoi: “Gigio është një djalë shumë i ndjeshëm. Ai nuk do ta përballonte dot skenën dhe preferoi të largohej që mjekët të kujdeseshin për Musialën”.
Reagimi i Neuerit ndaj Donnarummës ndezi debatet, por portieri i Real Madridit, Thibaut Courtois, e mbrojti kolegun italian, duke theksuar se “ishte një episod loje mes portierëve dhe sulmuesve”.
