“Këshilli Evropian bën thirrje për një armëpushim të menjëhershëm në Gaza dhe lirimin pa kushte të të gjithë pengjeve, duke çuar në një fund të përhershëm të armiqësive”, thuhet në përfundimet e shkruara të samitit të mbajtur në Bruksel.
Në të njëjtën kohë, liderët e BE-së morën në konsideratë raportin e shërbimit diplomatik të BE-së mbi pajtueshmërinë e Izraelit me nenin 2 të Marrëveshjes së Asociimit BE-Izrael, i cili ka të bëjë me respektimin e të drejtave të njeriut dhe parimeve demokratike.
Sipas shërbimit diplomatik të Unionit, ka indikacione se Izraeli ka shkelur detyrimet e tij sipas marrëveshjes.
“Këshilli Evropian merr shënim raportin mbi pajtueshmërinë e Izraelit me Nenin 2 të Marrëveshjes së Asociimit BE-Izrael dhe fton Këshillin të vazhdojë diskutimet mbi hapat e mëtejshëm, kur është e përshtatshme, brenda korrikut 2025, duke marrë parasysh zhvillimin e situatës në terren”, thuhet në tekstin zyrtar.
Ky raport lë të hapur mundësinë e marrjes së masave të mëtejshme ose të rishikimit të marrëdhënieve BE-Izrael , varësisht nga zhvillimet në Gaza dhe shkalla e pajtueshmërisë së Izraelit me parimet që rregullojnë marrëveshjet e tij me Bashkimin.
