Kovatchev: Do të ndjek nga afër përmbushjen e standardeve për integrim

Në kuadër të vizitës zyrtare në Parlamentin Europian, delegacioni i Partisë Demokratike të Shqipërisë, i kryesuar nga kryetari Sali Berisha, zhvilloi një takim me eurodeputetin Andrey Kovatchev, përfaqësues i Partisë Popullore Europiane (EPP) dhe anëtar i Parlamentit Europian nga Bullgaria.
Gjatë takimit, Berisha e informoi Kovatchev mbi gjendjen demokratike në Shqipëri, duke u ndalur në kontekstin e zgjedhjeve parlamentare të 11 majit 2025, ku theksoi se procesi u manipulua.
Siç njoftoi zyra e Medies dhe Komunikimit në PD “eurodeputeti Andrey Kovatchev theksoi se disa nga këto problematika janë tashmë të reflektuara në raportin e fundit të Parlamentit Europian për Shqipërinë, i diskutuar dhe votuar sot në Komisionin e Punëve të Jashtme (AFET)”.
Sipas PD-së “Kovatchev tha se në emër të Grupit të Partisë Popullore Europiane (EPP), do të ndjekë nga afër zhvillimet në Shqipëri dhe procesin pasues të vlerësimit nga misionet ndërkombëtare të vëzhgimit”.
Ai shprehu gjithashtu mbështetjen e plotë për aspiratën europiane të Shqipërisë, e cila sipas tij mund të realizohet vetëm përmes respektimit të demokracisë, të drejtës së votës së lirë dhe ndarjes së pushteteve.