Deputetët e Kuvendit të Kosovës për të 27-tën herë me radhë kanë dështuar që të konstituojnë përbërjen e re parlamentare, të dalë nga zgjedhjet e shkurtit.
Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe sërish refuzuan, në vazhdimin e seancës konstituive më 4 qershor, që të propozonin një përfaqësues që do të siguronte mbarëvajtjen e votimit të fshehtë.
Votimi i fshehtë është propozuar në vazhdimin e seancës konstituive më 1 maj nga kryesuesi i seancës, Avni Dehari, pasi e propozuara për kryeparlamentare nga Lëvizja Vetëvendosje, Albulena Haxhiu, në disa votime të hapura dështoi që të merrte 61 vota për t’u zgjedhur në këtë post.
Çështja e votimit të fshehtë po kundërshtohet nga partitë që mandatin e kaluar ishin në opozitë dhe është dërguar në Gjykatën Kushtetuese për interpretim. Ato vlerësojnë se mënyra se si LVV-ja po tenton që kryetari i ri i Kuvendit të zgjidhet përmes votës së fshehtë është jokushtetuese, duke kërkuar nga Gjykata që të marrë “një masë të përkohshme për ndalimin e mbajtjes së seancave, derisa me prioritet ta trajtojë këtë lëndë dhe të marrë një vendim”.
Kjo ishte hera e nëntëmbëdhjetë që deputetët refuzuan votimin e fshehtë për kryeparlametar. Seanca konstituive, që nisi më 15 prill, do të vazhdojë më 7 qershor.
Para nisjes së seancës, avokati Arianit Koci, tha se do të mbyllë dyert e Kuvendit, me qëllim që deputetët të qëndrojnë brenda sallës plenare deri të arrihet një marrëveshje politike për konstituimin e Kuvendit.
Ai pasi ua kërkoi këtë gjë të gjithë deputetëve që hynin në Kuvend, mbylli në mënyrë simbolike dyert e organit ligjvënës duke vendosur një fjongo,
PDK-ja dhe AAK-ja e konsiderojnë Haxhiun figurë përçarëse, duke kërkuar që LVV-ja – fituesja e zgjedhjeve që ka të drejtën ekskluzive të propozojë kandidatin për kryeparlamentar – të ndryshojë emrin.
LVV-ja insiston se Haxhiu e meriton të zgjidhet kryeparlamentare, teksa së voni, kjo parti ka thënë se po pret vendimin e Kushtetueses për këtë çështje.
LDK-ja, ndërkaq, ka thënë se nuk do të votojë asnjë të propozuar nga LVV-ja për postin e kryeparlamentarit.
Për ta konstituuar Kuvendin, deputetët duhet të zgjedhin kryetarin e ri dhe pesë nënkryetarët, për të cilët nevojiten 61 vota.
Vetëm pas zgjedhjes së tyre, organi ligjvënës konsiderohet i konstituuar, dhe pas kësaj hapet rruga për formimin e Qeverisë së re të Kosovës.
Shoqëria civile në Kosovë dhe faktori ndërkombëtar kanë bërë thirrje që Kosova të formojë sa më shpejt institucionet e reja.
