Shefja e Komitetit Ndërkombëtar të Kryqit të Kuq tha se Gaza është bërë më keq se ferri në tokë. Në një intervistë në selinë e KNKK-së në Gjenevë, presidentja e organizatës, Mirjana Spoljaric, tha se njerëzimi po dështon ndërsa shikonte tmerret e luftës në Gaza.
“Është bërë më keq se ferri… Nuk mund të vazhdojmë të shohim se çfarë po ndodh. Po tejkalon çdo standard të pranueshëm, ligjor, moral dhe njerëzor. Nivelin e shkatërrimit, nivelin e vuajtjes. Më e rëndësishmja, fakti që po shohim një popull të zhveshur tërësisht nga dinjiteti i tij njerëzor. Kjo duhet të tronditë vërtet ndërgjegjen tonë kolektive,” tha ajo.
Ajo shtoi se shtetet duhet të bëjnë më shumë për t’i dhënë fund luftës, për t’i dhënë fund vuajtjeve të palestinezëve dhe për të liruar pengjet izraelite. Fjalët, qartësisht të zgjedhura me kujdes, të presidentit të KNKK-së mbartin peshë morale. Kryqi i Kuq Ndërkombëtar është një organizatë humanitare globale që ka punuar për të lehtësuar vuajtjet në luftëra për më shumë se një shekull e gjysmë.
“Çdo shtet ka të drejtë të mbrojë veten. Dhe çdo nënë ka të drejtë t’i shohë fëmijët e saj të kthehen. Nuk ka asnjë justifikim për marrjen e pengjeve. Nuk ka asnjë justifikim për t’i privuar fëmijët nga qasja e tyre në ushqim, shëndetësi dhe siguri. Ka rregulla në zhvillimin e armiqësive që çdo palë në çdo konflikt duhet t’i respektojë,” shtoi më tej ajo.
A do të thoshte kjo se veprimet e Hamasit dhe palestinezëve të tjerë të armatosur më 7 tetor 2023 duke vrarë rreth 1200 persona dhe duke marrë peng më shumë se 250 të tjerë nuk e justifikonin shkatërrimin e Rripit të Gazës nga Izraeli dhe vrasjen e më shumë se 50,000 palestinezëve?
“Nuk ka asnjë justifikim për mungesën e respektit ose shpërfilljen e Konventave të Gjenevës. Asnjëra palë nuk lejohet të shkelë rregullat, pavarësisht gjithçkaje, dhe kjo është e rëndësishme sepse, shikoni, të njëjtat rregulla vlejnë për çdo qenie njerëzore sipas Konventës së Gjenevës. Një fëmijë në Gaza ka saktësisht të njëjtat mbrojtje sipas Konventave të Gjenevës si një fëmijë në Izrael,” tha Spoljaric.
KNKK-ja është një burim i besueshëm informacioni rreth asaj që po ndodh në Gaza. Izraeli nuk lejon organizatat ndërkombëtare të lajmeve, përfshirë BBC-në, të dërgojnë gazetarë në territor. Raportimi i më shumë se 300 punonjësve të KNKK-së në Gaza, 90% e të cilëve janë palestinezë, përbën një pjesë jetësore të të dhënave të luftës.
Spoljevic, presidentja e KNKK-së, ka folur çdo ditë me udhëheqësen e ekipit të tyre në Gaza. Spitali kirurgjikal i KNKK-së në Rafah është objekti mjekësor më i afërt me zonën ku shumë palestinezë janë vrarë gjatë shpërndarjes kaotike të ndihmave nga Fondacioni Humanitar i Gazës (GHF) i mbështetur nga Izraeli dhe SHBA-të.
Ashtu si OKB-ja, KNKK-ja nuk po merr pjesë në operacionin e ri. Një e metë themelore e sistemit të ri është se ai kanalizon dhjetëra mijëra civilë të dëshpëruar dhe të uritur përmes një zone aktive lufte. Në ditët e fundit, ekipet kirurgjikale të KNKK-së në spitalin e tyre fushor në Rafah pranë zonës së GHF janë mbingarkuar të paktën dy herë nga vëllimi i viktimave në trazirat e operacionit të ushqimit.
“Askund nuk është i sigurt në Gaza. Askund. As për civilët, as për pengjet. Ky është një fakt. Dhe spitali ynë nuk është i sigurt. Nuk më kujtohet një situatë tjetër që të kem parë ku të operojmë në mes të armiqësive,” tha Spoljeviç.
KNKK-ja tha se vetëm brenda pak orësh të martën në mëngjes, ekipet e saj kirurgjikale në Rafah morën 184 pacientë, përfshirë 19 persona që vdiqën në mbërritje dhe tetë të tjerë që vdiqën nga plagët e tyre pak më vonë. Ky ishte numri më i lartë i viktimave nga një incident i vetëm në spitalin fushor që kur u krijua pak më shumë se një vit më parë.
Ngjarja ndodhi rreth agimit të së martës. Dëshmitarët palestinezë dhe mjekët e Kryqit të Kuq raportuan skena të tmerrshme vrasjesh, ndërsa trupat izraelite hapën zjarr mbi palestinezët që po mblidheshin në vendin e ri të shpërndarjes së ndihmave në Gazën jugore. Ishte masakër totale sipas një dëshmitari të huaj.
Një deklaratë zyrtare nga ushtria izraelite përshkroi një pamje shumë të ndryshme. Ajo tha se disa të dyshuar lëvizën drejt forcave izraelite duke devijuar nga rrugët e caktuara të hyrjes. Ndërsa një zëdhënës ushtarak tha se po hetonin se çfarë kishte ndodhur. Ata kanë mohuar të kenë qëlluar palestinezë në një incident të ngjashëm të dielën. Spoljariç tha se KNKK-ja ishte thellësisht e shqetësuar për diskutimet për fitore me çdo kusht, luftë totale dhe dehumanizim.
“Po shohim gjëra që po ndodhin që do ta bëjnë botën një vend më të palumtur shumë përtej rajonit, shumë përtej izraelitëve dhe palestinezëve, sepse po i zbrazim vetë rregullat që mbrojnë të drejtat themelore të çdo qenieje njerëzore. Kjo është jetike. Për të ruajtur një rrugë drejt paqes për rajonin. Nëse e shkatërroni atë rrugë përgjithmonë, rajoni nuk do të gjejë kurrë siguri dhe mbrojtje. Por ne mund ta ndalojmë tani. Nuk është tepër vonë,” tha ajo.
KNKK-ja konsiderohet si kujdestari i konventave të Gjenevës. E katërta, e miratuar pas Luftës së Dytë Botërore, është hartuar për të mbrojtur civilët në luftëra. Sulmet e Hamasit ndaj Izraelit më 7 tetor 2023, tha ajo, nuk ishin justifikim për ngjarjet aktuale.
Izraeli nisi një fushatë ushtarake në Gaza në përgjigje të sulmit ndërkufitar të Hamasit, në të cilin u vranë rreth 1,200 persona dhe 251 të tjerë u morën peng. Të paktën 54,607 persona janë vrarë në Gaza që atëherë, përfshirë 4,335 që kur Izraeli rifilloi ofensivën e tij më 18 mars, sipas ministrisë së shëndetësisë të territorit.
