Finalja e Champions League 2025 mes PSG dhe Interit nuk është vetëm një duel për trofeun më të rëndësishëm europian të klubeve, por edhe përplasje mes dy botëve krejtësisht të ndryshme sportive.
Nga njëra anë qëndron PSG, simboli i fuqisë financiare të një shteti si Katari, me shpenzime marramendëse dhe qasje globale.
Në anën tjetër është Interi, që nën drejtimin e kapitalit amerikan ka ndërtuar një model të qëndrueshëm, të bazuar në racionalitet financiar dhe zgjuarsi në merkato. Ndërsa parizienët kanë investuar pa kursim për të ndërtuar një “brand” botëror, zikaltrit kanë rigjetur lavdinë përmes kursimit dhe strukturës.
Kjo finale nuk është vetëm për të shpallur kampionin e Europës, por për të treguar se cili model funksionon më mirë në futbollin modern. Është një përballje mes parasë pa limite dhe menaxhimit rigoroz, mes luksit dhe disiplinës.
Një reflektim i qartë i sfidave që po përjeton vetë futbolli europian. Prestigjiozja sportive “Marca”, përmes shifrave të hollësishme, mundohet t’i japë përgjigje kësaj dileme, apo finales së të shtunës në Mynih, e parë nga një këndvështrim ndryshe, me shkrimin e saj si më poshtë:
Finalja e Champions League 2025 nuk është vetëm çështje taktike, talenti apo golash. Ajo është gjithashtu një përballje filozofish. PSG dhe Interi përfaqësojnë dy modele të kundërta të mënyrës se si konceptohet dhe menaxhohet një klub futbolli në elitën europiane. Njëri beson tek investimi pa limite për të ndërtuar një markë globale; tjetri tek efikasiteti dhe kontrolli financiar si rrugë për të konkurruar.
PSG mbërrin në këtë finale me shifra gjigante: 790 milionë euro kosto të skuadrës, prej të cilave 659 milionë shkojnë për pagat
Edhe pse klubi parizien e ka ulur raportin e pagave ndaj të ardhurave në 82% (nga 109% në sezonin 2021/22), ai vazhdon të operojë në një shkallë të paarritshme për shumicën e rivalëve.
Në anën tjetër është Interi, i cili ka arritur të stabilizojë strukturën e vet pas vitesh me vështirësi ekonomike.
Kostoja e skuadrës zikaltër është më pak se gjysma e asaj pariziene: 309 milionë euro (nga të cilat 227 milionë janë paga), me një raport prej 57%, gjithnjë e më afër standardeve të qëndrueshmërisë që kërkon UEFA.
Ky model menaxhimi i përgjegjshëm iu ka lejuar zikaltërve të kalojnë nga humbja prej 239 milionë eurosh në sezonin 2020/21 në vetëm 27 milionë në 2023/24, me pritshmëri për fitime në sezonin aktual.
