Boksieri shqiptar Nelson Hysa renditet i 11 në botë nga dy prej federatave më të rëndësishme të boksit. Një nivel i tillë nuk ishte parë më herët për vendin tonë, fakt që tregon jo pak për zhvillimin e këtij sporti në vend.
Për herë të parë një boksier shqiptar arrin të renditet në vendin e 11 në dy nga federatat më të mëdha të boksit në botë.
Në azhornimet e bëra së fundmi WBO dhe WBA e klasifikojnë boksierin kuqezi të 11-in në botë në kategorinë e peshave të rënda.
Një arrije madhështore si për shkodranin ashtu dhe për vendin tonë që ka një përfaqësim kaq dinjitoz në disa nga nivelet më të larta të boksit.
Hysa ka një rekord të jashtëzakonshëm në boksin profesionist me 22 fitore në po kaq ndeshje, prej të cilave 20 me KO.
E radhës për Hysën do të jetë në 25 qershor, teksa do të rikthehet në Londër, për të tentuar një tjetër sukses, që do e ndihmonte në përfshirjen e 10 më të mirëve në botë, duke vijuar rrugën e tij të artë në piedestalin e boksit botëror.
Në vitet e fundit boksieri me shumë eksperiencë ka ndikuar në promovimin e këtij sporti në vendin tonë, duke qenë jo vetëm një nga boksierët ambasador të Shqipërisë, por dhe duke kontribuar në organizimin e vendeve të ndryshme në vendin tonë e jo vetëm.
Hysa e ka shtrirë gjeografinë e tij të aktiviteteve në Maqedoni të Veriut, Mal të Zi, Gjermani, Zvicër e Angli, teksa shumë shpejt pritet që të eksplorojë të tjera vende, me qëllimin për të ngritur lart flamurin kuqezi.
