Ish-banorja e “Big Brother VIP Albania”, Livia Brunga, ka ndarë një moment shumë të ndjerë gjatë një lidhjeje telefonike për emisionin “Pardon My French”, ku foli për ribashkimin e saj me të atin – një takim që ndodhi pas plot 22 vitesh. Livia rrëfeu për herë të parë emocionet që e kanë përfshirë në këtë kapitull të ri të jetës së saj. Ajo zbuloi se më parë e kishte takuar të atin vetëm dy herë – një herë kur ishte 2 vjeç dhe një herë tjetër në moshën 7-vjeçare.
“Takimi ishte i papritur, i bukur, i natyrshëm… sikur të mos ishim ndarë kurrë,” – u shpreh ajo. “Ishte ajo që më duhej: jo më përmes ekranit të telefonit, por fizikisht, duke ecur në rrugët e Shkodrës së bukur.”
Livia shtoi se komunikimi me të atin kishte nisur menjëherë pas daljes nga BBV. Ajo u ndje e befasuar nga sa lehtësisht rrjedhën bisedat mes tyre, si të mos kishte ndodhur asgjë gjatë dy dekadave të ndarjes.
“Më tha: jepi forca vetes, ndërto gjërat e tua, sidomos nëse e ke pasion ekranin. Por më tha edhe diçka që më preku shumë… që ëndrra e tij është të bëhet gjysh.”
E pyetur nëse ky ishte një plan i afërt apo i largët, Livia u përgjigj me buzëqeshje:
“Më vonë… tani jo.”
Në lidhje me familjen nga ana e babait, Livia tregoi se ende nuk ka pasur mundësi të takojë vëllain, pasi ai nuk ka qenë prezent në Shqipëri gjatë këtij takimi.
“Jemi në kontakt, por ende nuk jemi takuar. Babi ka ardhur vetëm. Kam qenë e ngarkuar, por pres që vëllai të vijë më vonë.”
Ky moment për Livian është një hap i rëndësishëm drejt pajtimit dhe balancës në jetën e saj personale, siç e përshkroi ajo vetë:
“Tani po futem në rrugën e ekuilibrit. Dhe ndihem shumë mirë.”
