Rusia hodhi poshtë të enjten idenë që vendet e NATO-s të dërgojnë trupa paqeruajtëse në Ukrainë në rast të një armëpushimi në luftën me Rusinë, duke thënë se një veprim i tillë do të shkaktonte një “përshkallëzim të pakontrollueshëm”.
Zëdhënësja e Ministrisë së Jashtme Maria Zakharova deklaroi se ideja ishte krejtësisht e papranueshme për Rusinë.
“Kjo është e papranueshme për ne, dhe nuk mund të lejojmë që Ukraina të “forcohet” nga dërgimi i trupava paqeruajtëse nga NATO”, theksoi Zakharova.
Në një konferencë shtypi, ajo iu referua deklaratave të fundit nga kryeministri britanik Keir Starmer dhe ministri gjerman i mbrojtjes Boris Pistorius rreth mundësisë që vendet e tyre mund të kontribuojnë me trupa në një forcë paqeruajtëse në Ukrainë.
Starmer tha në 16 janar se Britania kishte diskutuar idenë e një force paqeruajtëse me aleatët e tjerë dhe se “ne do të luajmë plotësisht rolin tonë”.
Rusia konfirmoi se është e hapur për një dialog me presidentin e SHBA-së, Donald Trump, i cili ka thënë se synon t’i japë fund të shpejtë luftës.
Presidenti ukrainas Volodymyr Zelenskiy, i cili po kërkon një takim me Trump reagoi të martën se të paktën 200,000 paqeruajtës evropianë do të nevojiten për të parandaluar një sulm të ri rus pas çdo marrëveshje armëpushimi.
