Kapiten Berat Gjimshiti ka reaguar me anë të një postimi në rrjetet sociale për rrugëtimin e Shqipërisë në Euro 2024.
Ai shkruan se kombëtarja tregoi karakter duke u përballur si e barabartë me gjigantët e futbollit, por i mungoi edhe fati. Mbrojtësi thekson se ajo që kombëtarja ka bërë në Gjermani ishte vetëm fillimi dhe e ardhmja do të jetë e ndritur.
Gjishmiti vlerëson edhe mbështetjen e jashtëzakonshme të tifozëve kuqezi.
“Një rrugëtim i jashtëzakonshëm që nga kualifikueset deri në Kampionatin Evropian. Treguam karakter si Kombëtare duke u paraqitur në fushë si të barabartë me gjigantë evropianë, por që na mungoi edhe fati për të arritur më shumë. Të jem kapiten i Kombëtares në një Evropian, është krenaria më e madhe për mua dhe t’i udhëheq këta bashkëlojtarë të mrekullueshëm ka qenë diçka unike.
Dua t’i falënderojë tifozët më të mirët në botë, tifozët Kuq e Zi që nuk na kanë lënë vetëm në asnjë moment duke na përkrahur me të gjitha mënyrat, por një falënderim edhe më i madh për ta është se treguan kulturë të lartë sportive, duke bërë që e gjithë Evropa të flasë mirë për ta dhe për kombin shqiptar. Kombëtarja ka të ardhme të ndritur dhe ky është vetëm një fillim i gjërave edhe më të mëdha që na presin. Përgjithmonë Kuq e Zi, Forca Shqipëria ime”, shkruan kapiten Gjimshiti.
