Me rastin e 26-vjetorit të krijimit të Policisë së Kosovës, Kryeministri në detyrë, Albin Kurti, deklaroi se kjo ditë nuk përfaqëson vetëm një përvjetor simbolik, por paraqet një dëshmi të rrugëtimit të përbashkët të shtetit dhe shoqërisë.
“Nuk është vetëm një datë që e shënojmë në kalendar, por një tregues i zhvillimit dhe bashkërendimit mes institucioneve dhe qytetarëve. Përballë shumë sfidave dhe përmes shumë sukseseve, Policia e Kosovës ka qëndruar e palëkundur, gjithmonë në shërbim të qytetarëve dhe të Republikës,” theksoi Kurti.
Ai e cilësoi Policinë si shtyllë të rendit dhe sigurisë në vend dhe premtoi se do të vazhdojë përkrahja e plotë institucionale. “Policia është baza e sigurisë sonë. Ne si institucione do të jemi gjithmonë pranë saj, duke ofruar mbështetje me të gjitha kapacitetet e nevojshme,” shtoi ai.
Kurti vlerësoi edhe angazhimin e Policisë gjatë vitit aktual, veçanërisht në veri të vendit. “Këtë vit, Policia e Kosovës ka dëshmuar sërish vendosmërinë dhe guximin e saj. Në veri, ajo ka vepruar pa kompromis ndaj krimit, terrorizmit dhe strukturave ilegale të ndihmuara nga Serbia,” tha ai.
Ai përmendi edhe operacionet konkrete: “Janë liruar ndërtesa publike të uzurpuara, janë mbyllur biznese të jashtëligjshme, si dhe janë konfiskuar armë dhe pajisje ushtarake. Të gjitha këto janë fitore për qytetarët tanë, të arritura falë përkushtimit të forcave policore, të cilat tregojnë se periudha e strukturave paralele ka përfunduar. Kosova është një dhe e pandarë për të gjithë qytetarët e saj.”
Kryeministri foli gjithashtu për angazhimin në ndjekjen e krimeve të luftës. “Policia jonë nuk ndalet as përballë së kaluarës. Arrestimet e personave të dyshuar për krime lufte dëshmojnë se drejtësia, edhe kur vonon, nuk mungon. Kjo është një detyrë ndaj kujtesës kombëtare dhe respekt ndaj viktimave të agresionit dhe gjenocidit të kryer nga Serbia,” tha Kurti.
Ai vuri në dukje kontributin e vajzave dhe grave në Policinë e Kosovës: “Gratë në uniformë janë të pranishme kudo në territorin e Republikës — nga pozitat drejtuese, njësitë speciale, te hetimet për krimet e rënda apo dhuna në familje. Ato kanë thyer barriera dhe kanë dëshmuar se përkushtimi nuk njeh gjini.”
Kurti përmendi gjithashtu përfshirjen e komuniteteve në Policinë e Kosovës: “Dhjetë për qind e trupës policore përbëhet nga pjesëtarë të komuniteteve jo-shumicë, dhe më shumë se gjysma e tyre janë serbë. Kjo pasqyron vizionin tonë për integrim dhe bashkëjetesë.”
Ai e krahasoi këtë realitet me situatën në Serbi: “Serbia, nga ana tjetër, vazhdon diskriminimin ndaj shqiptarëve në Luginë të Preshevës duke i përjashtuar nga strukturat e saj të sigurisë. Ky kontrast tregon qartë dallimin mes një Republike demokratike si Kosova dhe një shteti autoritar si Serbia.”
Ndërkohë, ministri në detyrë i Punëve të Brendshme, Xhelal Sveçla, u shpreh se integriteti është një ndër vlerat themelore të Policisë së Kosovës, e cila vazhdimisht ka dëshmuar përkushtim ndaj drejtësisë dhe sigurisë së qytetarëve.
Drejtori i Përgjithshëm i Policisë, kolonel Gazmend Hoxha, foli për rrugën e gjatë dhe sfidat që ky institucion ka kaluar, duke theksuar përkushtimin për të garantuar rendin dhe sigurinë publike në të gjithë vendin.
