Me rastin e 17-vjetorit të shpalljes së Pavarësisë së Kosovës, Kuvendi ka hapur dyert për fëmijët, duke mirëpritur rreth 5 mijë vizitorë gjatë pesë ditëve. Ky aktivitet është bërë tashmë një traditë, duke ofruar mundësinë që nxënësit e shkollave fillore, të mesme dhe kopshteve të shohin nga afër sallën plenare ku u shpall pavarësia më 17 shkurt 2008.
Drejtori i Drejtorisë për Media dhe Marrëdhënie me Publikun në Kuvendin e Kosovës, Musli Krasniqi, tha se çdo vit interesimi për vizita është në rritje. “Ky aktivitet është pjesë e kalendarit të Kuvendit për hapje dhe transparencë dhe çdo vit kemi më shumë kërkesa nga fëmijët për të vizituar institucionin”, tha ai.
Krasniqi shtoi se kjo rritje e interesimit reflekton një lidhje më të fortë të gjeneratave të reja me festën e pavarësisë dhe historinë e Kosovës. Deri tani, pavarësia e Kosovës është njohur nga mbi 110 shtete në mbarë botën.
