Kryeministri Edi Rama thotë se nuk dihet se çfarë vendimi do të merret në mbledhjen e Këshillit Evropian më 18 tetor, por nuk është krejt e pamundur që Franca të pranojë një kompromis për çeljen e negociatave për Shqipërinë dhe Maqedoninë e Veriut, për tu integruar në BE.
Përmes një komunikimi në faqen e tij në Facebook, Rama u shpreh se ende nuk është thënë fjala e fundit, ndërsa theksoi se shumë vende janë ‘pro’.
Ai tha më tej se vendi ynë i ka bërë detyrat e shtëpisë, ndërsa nënvizoi se cilido që të jetë vendimi përfundimtar, Shqipëria do të vijojë përpjekjen për anëtarësim.
“Macron s’është gati, qasja e Francës është ndryshe nga të tjerat. Shumica e vendeve janë pro. Kjo s’është qasje kundër Shqipërisë. Asgjë s’mund të përjashtohet deri në minutën e fundit, dhe askush s’duhet të harrojë patatet e nxehta që do diskutohen nga BE.
Por fjala e fundit ende s’është thënë. Se di as unë vetë si do përfundojë kjo Odise. Por ja çfarë di me siguri. Vendimmarrja e 18 tetorit s’ka lidhje me atë që kemi bërë ne.
Situata e tyre do të ishte po njësoj, dhe po të ishte vend tjetër. Vendimmarrja ka të bëjë me atë që duan vendet. Cilido që të jetë vendimi, dielli do të dalë sërish të nesërmen. Europën e duam për fëmijët tanë, për shqiptarët dhe gjeneratat e tjera”.
