Shqipëria

Video/Gardhi fut në sherr dy familje në Patos, Bashkia nuk zgjidh problemin

               Publikuar në : 20:19 - 15/05/19 M. S

Konfliktet me pronat në Shqipëri janë të shpeshta. Kamera e emisionit BOOM ka shkuar në fshatin Siqec në njësinë administrative Ruzhdie në Patos.

Shqetësimi në BOOM vjen nga një zonjë, e cila thotë se pranë tokës së saj një person ka ndërtuar një gardh.

Ajo thotë se toka është me tapi, ndërsa toka ku është ndërtuar gardhi është tokë shtet, por personi nuk i lejon që të shkojnë të punojnë arrën.

Gruaja thotë se konflikti për pronën ka 4 vjet. Ka shkuar në shumë institucione, por nuk ka gjetur zgjidhje.

Valentina Nuraj: Kemi katër vite që nuk futemi dot në prona sepse X-i nuk është fare banor i fshatit Siqec. Është larguar që në 87-ën nga fshati. Zotëron 9500 m tokë dhe 88 rrënjë ullinj. Toka e tij lulëzon, toka e tij shiko si është. Më 23 mars 2017 kam bërë kërkesë në Njësinë Administrative të Ruzhdies. Kanë ardhur drejtori, administratori  dhe e kanë vërtetuar që kjo është tokë shtet dhe është rrugë  dhe kanë thënë po, do ta largojmë gardhin. Nuk e di çfarë ndodhi, kur shkonim në njësi, na dërgonin në bashki, kur shkonim në bashki, na çonin në njësi. Për dhjetë muaj rresht, na kanë sorollatur. Pas shumë përpjekjesh në bashki ka dalë ky vërtetim dhe kjo hartë që vërteton tokën ku ka qenë toka e tij dhe kjo rrugë që ai e ka zaptuar.

Me praninë edhe të Adelinës, BOOM iu drejtua bashkisë Patos, ku ka patur edhe replika midis saj dhe nënkryetarit të bashkisë.

Bashkia Patos në dhjetor të 2018 ka lëshuar një urdhër për zotërinë që ka ndërtuar gardhin ku i kërkon ta heqë atë, pasi ka ndërtuar në tokë shtet. Në të kundërt do të veprojnë institucionet. Sipas nënkryetarit vendimi është zbatuar dhe gardhi është hequr. Por zonja thotë se është  vepruar sipas dëshirës, ashtu siç ka dëshiruar nënkryetari, pra është marrë vendimi për të hapur vetëm një hyrje të ngushtë që zonjës si fermere nuk i mundëson kalimin me mjete bujqësore.

BOOM iu drejtua edhe nënkryetarit të bashkisë Patos. Por problemi është në një tokë shtet dhe bashkia sot nuk ka një plan projekt për të ndërhyrë atje, -thotë ai .

Klajdi Alisinini, nënkryetari i Bashkisë Patos: Në bazë të ankesës që ka bërë zonja, ne kemi shkuar në terren, kemi ngritur edhe një grup pune. Grupi i punës vuri re që ajo ka rrugë për të shkuar në tokën e saj. Bashkia nuk ka plan për të ndërhyrë atje.

Ai pretendon që ka marrë një leje para 2015 dhe ne sot për sot nuk kemi projekt për të ndërhyrë atje. Ne nuk mund të prishim gardhin pa pasur një projekt. Ajo ka një dëshirë personale. Nëse e ka vënë prapa atëherë po, ne do të dërgojmë Inspektoratin e Ndërimit që ai gardh të hiqet. /Ora News

 

 

Kthehu
WhatsApp Denonco ne TT