Vendimi i Kolegjit Zgjedhor, Kaso: Nuk është në përputhje me ligjin elektoral

Sekretari për Çështjet Zgjedhore i Partisë Demokratike, Ivi Kaso ka reaguar pas vendimit që Kolegji Zgjedhor mori ditën e sotme, ku pranoi ankimin e Partisë Socialiste për listat e kandidatëve për deputetë të koalicionit opozitar, duke e çuar me 153 kandidatë në zgjedhje.

Kaso u shpreh me anë të një deklarate, se vendimi nuk respekton ligjin elektorale, dhe se ky ndalim është i ndikuar politikisht.

Deklarata

Vendimi i sotëm i Kolegjit Zgjedhor për listën e deputetëve nuk është vendim që respekton ligjin elektoral. Ndalimi i opozitës për t’u përfaqësuar në zgjedhje me lista të plota është i ndikuar politikisht nga interesi politik i partisë në pushtet. Jemi të keqardhur për këtë vendim që nuk i shërben ligjit dhe interesit publik, por ne besojmë se rezultati në fund të procesit zgjedhor do të tregojë se opozita është shumica politike në vend. Pavarësisht se vendimi i Kolegjit nuk është në përputhje me ligjin, ne do ta respektojmë atë dhe do të vazhdojmë betejën tonë për fitoren e zgjedhjeve në 25 Prill, për t’u sjellë shqiptarëve ndryshmin që duan dhe meritojnë.

Partia Demokratike kishte dërguar në KQZ, listën me 222 kandidatë për deputet, po kjo u cilësia e padrejtë nga Partia Socialiste dhe u ankimua.