Ish-deputetja e PD-së Grida Duma ishte e ftuar pasditen e sotme në emisionin “Kjo Javë” në “News 24”, ku komentoi ndër të tjera infektimin e vëllezërve Edmond dhe Robert Budina me COVID-19.
Ajo theksoi se situata është e dyshimtë, teksa shtoi se kryeministri Edi Rama është djallëzia e marketingut.
“Është e dyshimtë! Nuk janë rastësi disa gjëra. Janë ligësi, janë të qëllimshme. Ata janë dy personalitete që identifikojnë jo vetëm artistin, por edhe qëndresën e Aleancës për Mbrojtjen e Teatrit.
Kjo aleancë bëri sakrificën e vet sidomos në momentin e fundit të shembjes që ndodhi në kohë pandemie.
Mënyra e shembjes së teatrit ishte si hajnat, do të kishte thënë folku kombëtar.
Këta njerëz që sot gëzojnë respektin e shqiptarëve janë sot njëlloj simbolike me disa elementë, të artistit, qëndrestarit etj, ideja është për të kaluar tek marketimi apo reklama negative se këta që shiten sikur, janë ndërkohë ata që përhapin infeksionin.
Ne të gjithë e dimë kush është Edi Rama… është djallëzia e marketingut, e ekranit dhe batutës.
Kam bindjen e plotë që ai nuk qeveris, por përrallis. Ka marrë komplet stilin e periudhës komuniste, harxhon 1 mld për Parkun Rinia, mbledh njerëzit aty…unë besoj ata vetë në deklarimet e tyre se sa të besoj kryeministrin.
Qëllimi i Ramës i përgjigjet dyshimit tim. Ai ka qëllim t’iu thotë njerëzve mos u mblidhni në tubime se do infektoheni. Ai do të kapë çdo gjë.
Do të kapë komisionet, do të heqë koalicionet, do të kapë dhe bëjë pis çdo gjë sepse është i shqetësuar. Këmbanat për Edi Ramën kanë rënë, ai sot është edhe kundër ndërkombëtarëve dhe amerikanëve”, u shpreh Duma.
