Ulet avioni i parë në Rinas pas 24 orësh, mbërrijnë vaksinat anti-covid

Është ulur avioni i pare në aeroportin e Rinasit, 24 orë pas bojkotimit të punës nga kontrollorët e Albcontrol.

Mësohet se avioni ka ardhur nga Stambolli dhe është ulur në Rinas me ngarkesën e radhës të vaksinave kineze anti-Covid.

Në Rinas, avioni do të pritet nga kontrollorët turq, të cilët kanë ardhur në Shqipëri përmes rrugës tokësore, nga Podgorica. Ndërkohë nga nesër, pasagjerët do të mund të nisin fluturimet komerciale.

Prej ditës së djeshme, Shqipëria mbylli të gjitha fluturimet hyrëse dhe dalëse nga Rinasi për një afat të pacaktuar.

Kjo për shkak se 65 kontrollorët e Albcontrol, një kompani me kapital 100% shtetërore, refuzuan të dilnin në punë pasi firmosën edhe deklaratën e paaftësisë në punë.

Presidenti i Republikës, Ilir Meta ka kërkuar zgjidhje nga qeveria, ndërsa kryeministri Edi Rama i ka kërcënuar punonjësit e Albcontrol me burg.