Sulmet e Rusisë ndaj infrastrukturës energjetike të Ukrainës përbëjnë gjenocid, thotë një zyrtar i lartë ukrainas. Sulmet në objektet kryesore kishin në shënjestër “kombin ukrainas”, dhe ishin një përpjekje për të detyruar Kievin të dorëzohej, tha prokurori i përgjithshëm për “BBC”.
Termi gjenocid i referohet një përpjekje për të zhdukur një grup njerëzish. Rusia mohon të ketë ndonjë qëllim të tillë. Miliona njerëz në të gjithë Ukrainën po përballen me ndërprerje të energjisë elektrike, për shkak të motit të ftohtë, pas sulmeve të vazhdueshme ruse.
Zyrtarët thonë se Kherson tani është furnizuar plotësisht, pas rimarrjes së qytetit nga trupat ukrainase në fillim të këtij muaji. Por njerëzit në 14 rajone dhe kryeqytetin Kiev mbeten nën kufizime përdorimi, sipas presidentit Volodymyr Zelensky.
Gjenocidi përfshin “synimin për të shkatërruar, tërësisht ose pjesërisht, një grup kombëtar, etnik, racor ose fetar”, sipas një përkufizimi të dhënë nga Konventa e OKB-së për Gjenocidin.
Ndër aktet që mund të kualifikohen janë vrasja ose shkaktimi i dëmeve serioze ndaj anëtarëve të atij grupi – ose transferimi me forcë i fëmijëve të tij diku tjetër.
Prokurori i Përgjithshëm ukrainas Andriy Kostin tha se si dhe sulmet në rrjetin e energjisë, 11,000 fëmijë ukrainas ishin dëbuar me forcë në Rusi.
Kostin tha se zyra e tij po hetonte raportet për më shumë se 49,000 krime lufte dhe krime agresioni që kur Rusia nisi pushtimin e saj në shkallë të plotë më 24 shkurt.
“I njëjti model sjelljeje” po shihej në çdo vendbanim ukrainas të pushtuar nga forcat ruse”, vuri në dukje ai.
Një krim lufte përbën shkelje të të ashtuquajturave “rregulla” të luftës të përcaktuara nga traktatet ndërkombëtare, përfshirë Konventat e Gjenevës.
Ndër të tjera, Konventat parashikojnë që civilët duhet të mbrohen. Rusia është akuzuar vazhdimisht për shkelje të këtij rregulli.
Burimi i lajmit: BBC. Përshtatur nga Tirana Today
