Tre drejtorë burgjesh, të cilët u shkarkuan nga detyra për përfshirje në fushatë elektorale, e cilësojnë si të paprecedentë dhe të paligjshëm largimin nga puna.
Etnor Krakulli i IEPV Fier, Fatjon Fanaj i IEVP “Jordan Misja” Tiranë dhe Ahmet Bala i IEVP Rrogozhinë thonë se ishin ftuar në një mbledhje nga ministri i ri i Drejtësisë Gazment Bardhi, bashkë me drejtorë të tjerë dhe janë befasuar kur kanë zbuluar më pas shkarkimin.
Ata sqarojnë pozicionin e tyre përmes një letre dhe deklarojnë se do ta ndjekin çështjen në rrugë ligjore, ndërsa thonë se “shkarkimi ynë ndodh pikërisht kur fushata zgjedhore ka afruar, dhe synon keqpërdorimin e IEVP-ve nga partitë politike, duke rrezikuar me ketë akt dhe sigurinë kombëtare”.
LETRA:
Me anë të kësaj deklarate, duam të denoncojmë aktin e paligjshëm dhe të paprecedent të shkarkimit tonë. Diten e shtunë, në datën 3 qershor 2017 u njoftuam për të marrë pjesë në një mbledhje të zhvilluar me të gjithë Drejtorët e Burgjeve si dhe me Drejtorin e Përgjithshëm të Burgjeve në Ministrinë e Drejtësisë. Por pas përfundimit të kësaj mbledhje, u çuditëm kur pamë vetëm në media, lajmin për largimin tonë nga detyra me motivacionin e përfshirjes sonë në fushatën elektorale. Ky motivacion është i pabazë, i gënjeshtërt, i pafaktuar dhe tendencioz. Për më tepër në këto momente është shoqëruar dhe me akte të tjera antiligjore proceduriale, për të cilat ne do të vijojmë ndjekjen në rruge ligjore. Është shqetësuese që një vendim i tillë merret në këtë situatë, kur institucionet të tilla që ne drejtojmë ndodhen aktualisht pa drejtues, cka të bën të mendosh se ky veprim nuk është i rastësishëm dhe pas tij ndoshta fshihet një qëllim edhe më i errët. Shkarkimi ynë ndodh pikërisht kur fushata zgjedhore ka afruar, dhe synon keqpërdorimin e IEVP-ve nga partitë politike, duke rrezikuar me ketë akt dhe sigurinë kombëtare. Ne do të vazhdojmë të ndjekim rrugën ligjore për të venë në vend dinjitetin tonë, duke kallëzuar penalisht Ministrin e Drejtësisë dhe Drejtorin e Përgjithshëm të Burgjeve.
Etnor Krakulli IEVP Fier,
Fatjon Fanaj IEVP Jordan Misja Tirane
Ahmet Bala IEVP Rrogozhine