Një 33-vjeçar shqiptar, i dëbuar më parë nga Italia, është arrestuar nga karabinierët në Cesenatico, pasi u kap duke shpërndarë drogë me një identitet të rremë.
Arrestimi u krye gjatë orëve të vona të 5 marsit, kur i riu u kap në flagrancë duke shitur dy doza kokaine një klienti vendas. Gjatë kontrollit në banesën e tij, policia gjeti 60 doza kokaine me peshë 35 gramë, së bashku me pajisje për paketimin dhe një shumë parash që dyshohet se janë të ardhura nga aktiviteti kriminal.
Hetuesit zbuluan se shqiptari kishte përdorur një dokument identifikimi të lëshuar nga autoritetet shqiptare, me të dhëna personale që nuk përputheshin me regjistrimet e mëparshme të policisë italiane. Ai ishte dëbuar nga Italia dhe i ishte ndaluar hyrja për 5 vite, por arriti të rikthehej në mënyrë të paligjshme.
Pas procedurave të identifikimit, u konfirmua identiteti i tij i vërtetë. Prokuroria e Forlit urdhëroi ndalimin e tij në qelitë e karabinierëve, në pritje të seancës për vlefshmërinë e arrestimit.
