Emisioni ‘Top Story’ në televizionin Top Channel, në një kronikë për skandalet e diplomacisë shqiptare, bëri publike një listë me emrat e fëmijëve të diplomatëve shqiptarë, të cilët, mbajnë pasaportat diplomatike në mënyrë abuzive.
Gazetarët thonë në kronikën në fjalë se në këtë rast është shkelur neni 54 i ligjit për shërbimin e jashtëm, që thotë se fëmijët e diplomatëve mund të mbajnë pasaportën diplomatike deri në moshën 18 vjeç, e pas kësaj moshe duhet ta dorëzojnë atë.
Po kështu, në këtë listë figurojnë fëmijë diplomatësh që kanë pasaportë diplomatike, edhe pse e kanë kaluar moshën 18 vjeç. Si rast të veçantë morën vëllezërit Erlind dhe Taulant Sulko, djemtë e Taip Sulkos që shërben si këshilltar ministër në Ambasadën Shqiptare në Kanada.
Duket se kjo kronikë nuk ka shkuar në vesh të shurdhër. Pas kësaj kronike ka reaguar njëri nga djemtë e diplomatit shqiptar, Erlind Sulko, i cili është shprehur se informacionet që gazetarët e Top Channel i kanë servirur publikut, janë të pavërteta.
Me anë të një shënimi në Facebook, Sulko thotë se ky informacion nuk është i vërtetë.
“Do isha shumë i lumtur po të ishte e vërtetë: më në fund do më hynte në punë pasaporta shqiptare. Por, fatkeqësisht nuk është e vërtetë”.
Sipas tij, gjithçka që është thënë në adresë të tij dhe vëllait, Taulant Sulkos, janë shpifje, pasi ai dhe vëllai i tij e kanë dorëzuar pasaportën diplomatike dhe udhëtojnë me dokumente kanadeze. Gjithashtu, Sulko thekson se në ‘kohën kur kishim pasaporta diplomatike, ligji ishte për fëmijët nën 26 vjeç, jo nën 18’, duke shtuar se Top Channel është kthyer në një vegël partiake që përdoret për të sulmuar njerëz të ndershëm.
“Sot ka qenë radha ime të duroj fyerjen dhe baltosjen e padrejtë timen dhe të familjes sime. Nesër është radha juaj”, shkruan Erlind Sulko në fund të reagimit të tij.
