Kronikë

U përleshën me armë teksa transportonin drogë me mushka, kapet pas 4 vitesh skraparlliu

               Publikuar në : 15:42 - 11/07/19 Enno

Një 41-vjeçar, i shpallur në kërkim prej 4 vitesh, ka rënë sot në prangat e policisë së Skraparit, pasi akuzohet për “Vrasje me dashje, të mbetur në tentativë” dhe “Trafik droge”.

Bëhet fjalë për Fatri Ibro, banues në fshatin Nikollarë të Skraparit, për të cilin dyshohet se bashkë me dy vëllezërit e tij, Ilirjan dhe Gazmor Ibro, katër vite më parë, po transportonin drogë me mushka nga Skrapari në Përmet, ndërsa janë përplasur me armë me 4 persona të tjerë.

I plagosur në atë kohë mbeti Gazmor Ibro, ku po ashtu uniformat blu sekuestruan 100 kg marijuanë që po transportohej me mushka.

Kujtojmë se policia bëri me dije se gjithçka nisi për lëndën narkotike. Gazmor Ibro, banues në fshatin Nikollar të Skraparit së bashku me dy vëllezërit e tij po transportonte me mushka drogën, kur Roland Pata 41 vjeç, Altin Merdani 36 vjeç, Stefan Gjoka 32 vjeç, dhe Elton Abazaj 34 vjeç u kanë dalë përpara për t’i grabitur. Sipas bluve ata kanë shtënë me armë zjarri duke lënë të plagosur Gazmor Ibron.

4 persona ranë në prangat e policisë dhe 4 të tjerë u shpallën në kërkim, përfshirë edhe Fatri Ibron.

Pas arrestimit të katër shtetasve në lidhje me këtë ngjarje, policia shpalli në kërkim shtetasit: Stefan Gjoka, banues në Qeparo të Vlorës, Elton Abazaj,banues në Gjirokastër dhe dy vëllezërit Ilirjan e Fatri Ibro, banues në fshatin Nikollarë të Skraparit.

Krahas 100 kg marijuanë që u kap dhe sekuestrua në vendngjarje, vëllezërve Ibro u janë gjetur në banesë edhe 60 bimë narkotike kanabis sativa, ndërkohë që policia sekuestroi pas ngjarjes në banesën e Roland Patës edhe dy doza kokaine prej 1.5 gram dhe 5.1 kg hashash.

Gjatë ngjarjes, policia sekuestroi gjithashtu tre automjete me targa AA122JC ; AA042 AU dhe AA337HY, 11 gëzhoja automatiku mod.56, 2 gëzhoja pistolete të kal. 7.62mm dhe një fishek model 56 .

Shfaq Komentet (0)

Shkruaj nje koment

Adresa juaj email s’do të bëhet publike. Fushat e domosdoshme janë shënuar me një *

* *

Kthehu
WhatsApp Denonco ne TT