Turqia shtrëngon masat, orë policore çdo natë e mbyllje totale gjatë fundjavës

Rastet me koronavirus kanë sjellë vështirësi për sistemin shëndetësor. Ndodhur në kushtet kur vala e pandemisë po sjell një fluks të shtuar të të infektuarve, Turqia ka rikthyer izolimin. 31.219 infeksione të reja dhe 188 vdekje u raportuan gjatë ditës së djeshme.

Presidenti turk, Recep Tayyip Erdogan, ka njoftuar hyrjen në fuqi të masave shtrënguese. Mediat turke raportojnë se masat e ndërmarra përfshijnë shtrirjen e shtetrrethimit për të gjitha netët dhe të gjitha fundjavat.

Pas mbledhjes së qeverisë, Erdogan tha se ora e ndalimit do të zgjasë nga ora 21:00 deri në orën 05:00, çdo ditë pune dhe se gjatë fundjavave ndalimi i lëvizjes do të jetë në fuqi nga e premtja në 21:00 deri të hënën në 05:00.

Personat mbi 65 vjeç dhe më të vegjël se 20 vjeç, të cilët lejohen të kalojnë vetëm tre orë në ditë jashtë shtëpisë, nuk do të lejohen të përdorin transportin publik. Pjesëmarrja në dasma dhe funerale do të jetë më e reduktuar, ku do marrin pjesë maksimumi 30 persona.

Gjatë periudhave të caktuara të orës policore, do të jenë në gjendje të veprojnë dyqanet e nevojshme të mallrave dhe shërbimet e shpërndarjes së ushqimit.