Një ngjarje e rëndë ka ndodhur në Basel të Zvicrës, ku një 7-vjeçar me origjinë nga Kosova është qëlluar me thikë nga një e moshuar.
Fatkeqësisht vogëlushi nuk ka mundur t’u mbijetojë plagëve të marra, duke ndërruar jetë në spital.
I mituri Mërgim L., me origjinë nga Lipjani, u gjet në trotuar nga mësuesja e tij, pasi ngjarja kishte ndodhur vetëm pak metra larg shkollës, teksa ai po kthehej pas mësimit për në shtëpi.
Ai u dërgua me urgjencë në spital, ku edhe ndërroi jetë. Ngjarja ka tronditur opinionin publik në Zvicër, ndërsa autorja është dorëzuar më pas në polici.
Shkaqet e krimit mbeten të paqarta, ndërsa hetuesit po vijojnë punën për ta zbardhur ngjarjen e rëndë. Mëngjesin e së premtes, psikologët e shkollës kanë folur me nxënësit e tjerë të shkollës ku vogëlushi mësonte.
Po ashtu, sot bashkëmoshatarët e 7-vjeçarit dhe familjarët kanë vendosur lule dhe qirinj në trotuarin ku u gjet pasdreken e së enjtes.
Edhe kryeministri i Kosovës ka reaguar lidhur me ngjarjen e rëndë, me anë të një postimi në Facebook, ku shpreh ngushëllimet më të thella.
“Ndajë dhembjen e madhe dhe ua përcjellë ngushëllimet më të thella familjes së Mërgimit, 7-vjeçarit të vrarë dje në Basel të Zvicrës. Mendimet dhe lutjet e mia janë me ju në këto çaste të rënda.», përfundon Haradinaj./ Tirana Today
