E premte, 22 Janar, 2021
10 C
Tirana

Teksasi padi në Gjykatën e Lartë, përpiqet të përmbysë rezultatin e zgjedhjeve

Shteti i Teksasit tha të martën se ka ngritur padi në Gjykatën e Lartë kundër shteteve Xhorxhia, Miçigan, Pensilvani dhe Uiskonsin, duke i quajtur të paligjshme ndryshimet e bëra nga këto shtete në procedurat e zgjedhjeve për shkak të pandemisë.

Padia, e njoftuar nga Prokurori i Përgjithshëm republikan i Teksasit Ken Paxton, synon të ndihmojë Presidentin Donald Trump për të përmbysur rezultatet e zgjedhjeve.

Padia u paraqit drejtpërdrejt në Gjykatën e Lartë, në formën e lejuar për çështje të caktuara gjyqësore midis shteteve. Gjykata e Lartë ka një shumicë konservatore 6-3 dhe përfshin tre gjyqtarë të emëruar nga Presidenti Trump.

Padia në fjalë është një tjetër përpjekje ligjore që synon të përmbysë humbjen e presidentit republikan ndaj presidentit të zgjedhur demokrat Joe Biden në zgjedhjet e 3 nëntorit.

Teksasi i qeverisur nga republikanët akuzon zyrtarët e zgjedhjeve në të katër shtetet se dështuan të mbronin nga manipulimet votimin me postë, duke zvogëluar sipas tij “peshën e votave të hedhura në shtetet që respektojnë ligjërisht strukturën zgjedhore të përcaktuar në Kushtetutë”.

Zyrtarët shtetërorë të zgjedhjeve kanë thënë se nuk kanë gjetur prova të një mashtrimi në shkallë të tillë sa që të ndryshonte rezultatet. Për shkak të pandemisë, pati një rritje të votimit me postë, pasi shumë amerikanë qëndruan larg vendeve të votimit për të shmangur infektimet me COVID-19.

Teksasi po kërkon që Gjykata e Lartë të bllokojë votat e Kolegjit Zgjedhor në të katër shtetet – gjithsej 62 vota – që ato të mos numërohen. Zoti Biden ka marrë 306 vota elektorale, më shumë se sa 270 që ishin të nevojshme, krahasuar me 232 për zotin Trump, ndërsa fitoi gjithashtu votën popullore në shkallë vendi me 7 milion vota më shumë se rivali i tij.

Lexo edhe :   Twitter bllokon llogarinë e Ambasadës së Kinës në SHBA

Teksasi gjithashtu po kërkon që Gjykata e Lartë të shtyjë afatin e 14 dhjetorit, dita kur Kolegji Zgjedhor do të mblidhet për të votuar.

Lexo edhe :   Presidenti Biden nënshkruan tre dokumentat e para

Paul Smith, profesor i fakultetit juridik të Universitetit Georgetown, tha se Teksasi nuk ka bazë ligjore për të ngritur padinë.

“Nuk ka asnjë mënyrë të mundshme që shteti i Teksasit të ankohet rreth mënyrës se si i numëruan votat shtetet e tjera dhe se si do t’i hedhin ato votat e tyre elektorale”, tha profesor Smith.

Gjykata e Lartë nuk është e detyruar ta marrë në shqyrtim çështjen dhe ka thënë në vendimet e mëparshme se “juridiksioni i saj” që lejon ngritjen drejtpërdrejt përpara saj të çështjeve gjyqësore midis shteteve, duhet të përdoret në mënyrë të kursyer./VOA/

- Reklama -

Më shumë nga kategoria




Të fundit

Krizë totale, Liverpooli humbet ndaj modestëve të Anglisë

Liverpooli është në krizë totale! Ekipi i Jurgen Klopp u mposht në shtëpi nga modestët e Burnleyt me rezultatin 0-1 duke lënë 3 pikë...

Vrasja e Aleks Nikës, Balla: Predha u dëmtua qëllimisht me urdhër të Berishës

10 vite pas vrasjes së katër protestueve në vrasjen e 21 janari të vitit 2019, Policia e Tiranës ka kërkuar ditën e sotme rifillimin...

Gazetarët po rrezikohen nga gjuha e partive politike

Një sondazh i bërë për zgjedhjet e parakohshme parlamentare nga RTV Dukagjini ka nxitur dy partitë politike, Lidhjen Demokratike të Kosovës dhe Partinë Demokratike...

Deputeti i PS: Isha 2 m larg Aleks Nikës në 21 janar, e pashë se kush e vrau

Deputeti i Partisë Socialiste, Alket Hyseni ka bërë një deklaratë të fortë, ku është shprehur se ka qenë shumë afër me Aleks Veizin në...

Sondazhi/ PS do të fitonte zgjedhjet nëse do të mbaheshin sot

Nëse zgjedhjet parlamentare të 25 prillit do të zhvilloheshin sot, një sondazh i Euronews Albania në bashkëpunim me kompaninë prestigjioze MRB, zbuloi se 41.8...