Presidenti Donald Trump kërkon një rishikim të plotë të të gjithë shtetasve afganë që kanë hyrë në Shtetet e Bashkuara gjatë administratës Biden, pasi një shtetas afgan u identifikua si i dyshuari në plagosjen e dy pjesëtarëve të Gardës Kombëtare në Washington, D.C. I dyshuari, Rahmanullah Lakanwal, 29 vjeç, kishte mbërritur në SHBA në shtator 2021 përmes programit “Operation Allies Welcome”, që synonte të strehojë afganët që kishin ndihmuar forcat amerikane.
Dy anëtarët e Gardës Kombëtare ndodhen në gjendje kritike, ndërsa Lakanwal është gjithashtu i shtruar në spital pas shkëmbimit të zjarrit. Autoritetet e Uashingtonit deklaruan se sulmi dukej i synuar ndaj ushtarëve. Familjarë të të dyshuarit shprehën habi, duke theksuar se ai kishte shërbyer për 10 vite në ushtrinë afgane dhe vetë kishte qenë në shënjestër të talibanëve.
Pak minuta pas deklaratës së Trump, Shërbimi i Shtetësisë dhe Imigracionit (USCIS) njoftoi pezullimin e menjëhershëm të procesimit të kërkesave të imigracionit për shtetas afganë, derisa të rishikohen procedurat e sigurisë. Paraprakisht, një memorandum e administratës Trump parashikonte rishikimin e rreth 200 mijë refugjatëve të pranuar gjatë administratës Biden.
Ndërkohë, organizata #AfghanEvac paralajmëroi se incidenti nuk duhet të përdoret për të stigmatizuar komunitetin afgan, duke theksuar se afganët që hyjnë në SHBA i nënshtrohen një procesi të gjatë dhe të rreptë verifikimi.
Raporte të mëparshme tregojnë se mbi 80 mijë afganë janë sistemuar në SHBA pas tërheqjes së trupave amerikane në vitin 2021, ndërsa më shumë se 152 mijë të tjerë vazhdojnë të presin për viza speciale imigrimi.
