Deputeti Gent Strazimiri ka komentuar protestën e sotme, ndërsa lënien e mandateve e konsideron si çlirimin e vendit. Teksa akuzoi qeverinë se erdhi në pushtet me vjedhjen dhe blerjen e votave, Strazimiri bëri me dije se protestat e opozitës do të vijojnë çdo ditë.
I ftuar në studion e News 24, në rubrikën “Opinion”, deputeti demokrat deklaroi se në këto kushte, nuk dihet se çfarë do të ndodhë pasi tashmë gjithçka është e paparashikueshme, ndërsa shtoi se populli shqiptar nuk fle, por ngrihet dhe bën të papriturën pikërisht atëherë kur mendon se e ke gjunjëzuar.
Fjala e Strazimirit:
Sot është një ditë çlirimi. Mandatet janë dorëzuar për shkak se bazat e demokracisë janë shkelur në Shqipëri. Të bësh shurdhin dhe memecin në këtë situatë, kur të rezulton se qeveria ka 73 mandate në këmbim të favore, unë nuk e konsideroj legjitime.
DASH nuk thotë që kjo është një qeveri që ka dalë nga blerja e votave. Komunikimi i djeshëm, paska ndodhur mbrëmë telefonata, ka ardhur pak vonë kur të gjithë ne kishim firmosur. Ka qenë mundësia e vetme që vendi të mos vuajë më enverizëm.
Qeveria tranzitore
Të gjitha modalitetet ligjore gjenden nëse vendi çlirohet nga kjo qeveri e krimit. Le t’i shohim gjërat hap pas hapi, nuk e parashikojmë dot se çfarë ndodh pas një orë. Në shesh ishte populli, jo një grup kriminelësh. Një qeveri e përgjegjshme kur detyrohet të rrethohet me tela me gjemba, duhet të thotë: Popull më fal, unë po largohem. Por ajo nuk ka dalë nga populli, ka dalë nga vjedhja e votave.
Nuk kemi pasur kurrë dilemën nëse duhet t’i lëmë mandatet. E gjithë dilema ka qenë sot, nesër apo kur. Ka pasur një përpjekje titanike të gjithë deputetëve, në parlament çfarë nuk ka ndodhur për shkak të kryeministrit.
Jemi përpjekur 6 vjet rresht t’i themi stop në mënyrë institucionale, kemi marrë si përgjigje edhe sulme fizike. Në këto kushte, nuk ka asnjë arsye të kemi dilema. Secili prej nesh e niste: Kemi lënë gjë pa bërë gjatë këtyre 6 viteve në Kuvend?
S’kemi bërë asnjë minutë politikë, kemi bërë beteja, por në asnjë minutë politikë. Rama është në hasmëri me popullin, me ata që nuk ngopen dot me bukë. Jetojmë në një vend që 70% duan të ikin. 80% e të ardhurave shkojnë për të ngrënë, pjesa tjetër për të paguar taksa. Parlamenti me gjemba është dramatike. Fëmija që ka lindur para 28 vitesh, vazhdon të merret me Gramoz Ruçin. Kemi detyrimin të lëmë një Shqipëri siç do duhet të ishte. Protestat do vazhdojnë pa ndalim, asnjë ditë pushim.
Ky është një popull që nuk fle, që nuk ulet në gjunjë. Duket sikur e ke gjunjëzuar, në atë moment ngrihet dhe bën të papriturën./ Tirana Today
