SPAK pushon hetimet për Lefter Allën: Nuk ka vepër penale

SPAK ka pushuar hetimet për ish-kryetarin e Bashkisë së Bulqizës, Lefter Alla.

Hetimet ndaj Allës nisën në janar të këtij viti, menjëherë pas publikimit të një videoje, ku pretendohej se Alla shfaqej duke konsumuar kokainë në banakun e një lokali.

Ndaj ish-kryebashkiakut rëndonin dyshimet për prodhim dhe mbajtje të lëndëve narkotike.

Ai u thirr me urgjencë në SPAK për të dhënë shpjegime rreth videos, ku deklaroi se nuk mbante mend të kishte patur episode të tilla dhe se ai filmim nuk kishte të bënte me të.

Mes të tjerave Alla, i ka kërkuar prokurorisë t’i vinte në dispozicion një filmim më të qartë, me qëllim që të mund të jepte shpjegime të detajuara, dhe ka theksuar se nuk i njeh personat e tjerë të shfaqur në video.

Në kuadër të hetimit, kryebashkiaku iu nënshtrua dhe testit të drogës, prej nga rezultoi se ai nuk ishte përdorues i lëndëve narkotike.

Prokuroria urdhëroi gjithashtu dhe ekspertimin teknik të videos ku pretendohej se shfaqej Alla.

Sipas “News 24”, në dosje thuhet se ekspertët dolën në konkluzionin se filmimi nuk është marrë drejtpërdrejtë nga pajisja regjistruese, por është regjistruar me aparat celular, nga ekrani i një kompjuteri, ndaj për këtë këtë arsye, nuk mund të përcaktohet qartë data dhe ora reale e regjistrimit, si dhe nuk mund të identifikohen personat që shfaqen në të.

Sipas prokurorit Nakuci, çështja penale duhet pushuar, pasi fakti nuk përmban element të veprës penale.

Dosja i është dorëzuar Gjykatës së Posaçme kundër Korrupsionit dhe Krimit të Organizuar dhe pritet që në shtator gjykatësi, Sandër Simoni të dalë me vendim.