Sot pritet të mbahet seanca gjyqësore për ish-ministrin e Brendshëm, Saimir Tahiri dhe ish-drejtorin e Policisë së Vlorës, Jaeld Çela. Seanca gjyqësore do të mbahet në orën 10:00 në Gjykatën e Lartë. Tahiri është dënuar në shtator të vitit 2019 nga Krimet e Rënda me 5 vite burg, por me gjykim të shkurtuar dënimi iu ul në 3.4 vite burgim. Edhe këtë dënim, gjykata vendosi ta konvertojë në 3 vite shërbim prove, periudhë në të cilën ish-ministri nuk duhet të kryejë asnjë vepër penale. Po ashtu, për 3 vite, ish-ministri Tahiri nuk duhet të ushtrojë funksione publike.
Tahiri dhe Çela u akuzuan për “trafik droge”, në kuadër të grupit kriminal të drejtuar nga Moisi Habilaj. Hetimi për ish-ministrin e Brendshëm dhe ish-drejtorin e policisë Vlorë dhe zyrtarë të tjerë nisi dy vite më parë. Ish-ministri Tahiri u akuzua për tre vepra të rënda penale “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”, por gjykata i rrëzoi këto akuza duke e dënuar për “shpërdorim detyre”, gjë që Tahiri nuk e pranoi duke vijuar betejën ligjore në Gjykatën e Lartë, ku do të mbahet sot seanca e parë.
