Kuqezinjtë mbrëmjen e kaluar siguruan një rezultat mjaft të kënaqshëm, në përballjen me Islandën. Në total 4 gola u shënuan nga ana e Kombëtares shqiptare, duke zbehur kështu humbjen me Francën. Ndërkohë lidhur me situatën aktuale, ka reaguar ish-lojtari i Kombëtares, Sokol Kushta.
“Urime për fitoren e bukur Kombëtares. Fituesit nuk gjykohen, por analizohen. Është nga herët e pakta që kombëtarja jonë reagon pozitivisht nga një humbje shkatërruese si ajo e Francës. Jo në drejtimin sportiv, por psikologjik dhe fizik, këtu duket dora e një prej trajnerëve më të mirë në Evropë. Ai arriti të vendosë balancën në psikologjinë e ekipit, rinovoi ekipin për 4 ditë dhe kjo u duk në reagimin pozitiv të ekipit kur mori golin e dytë.
Gjithmonë ekipi jonë bie nga ana psikologjike dhe fizike, por kjo nuk ndodhi këtë herë, e kundërta, shënoi dy herë dhe u rrit fizikisht me ndërrimet që bëri. Po të vëmë re dhe parametrat fizikë, mbajtja e topit dhe taktika e trajnerit ishin të dukshme superiore karshi një kundërshtari të fortë, krahas shumë lojtarëve të rinj dhe premtues.
Doja të uroja Baren për të dyja ndeshjet e shkëlqyera. Ishte një përgjigje e fortë për shumë skeptikë që nuk nguruan të hidhnin baltë mbi të. Minimumi duhet të heshtnin dhe të kërkonin falje për të. E them për Baren dhe duhet të jetë mësim për çdo lojtar të ri që vjen te kombëtarja, që duhen përkrahur dhe ndihmuar në momentet e para. Suksese për ndeshjen me Turqinë”, ka shkruar Kushta në rrjetet sociale.
Denonco ne TT