Martin Shkreli, i njohur ndryshe si shqiptari më i urryer në botë, është bërë pjesë e një serie dokumentarësh, realizuar nga kompania televizive amerikane Netflix, me emrin “Dirty Money” (Paratë e pista), që ka nisur të transmetohet në këtë platformë.
Cikli i dokumentarëve përfshin rrëfime interesante për organizatën Trump dhe karrierën e Donald Trumpit në biznes, ndërsa në një prej episodeve flitet edhe për skandalin e barnave në SHBA, industri kjo që është keqpërdorur shumë nga kompani të mëdha që kanë blerë kompani prodhuese të vogla farmaceutike nga ku pastaj i kanë rritur çmimet në mënyrë enorme.
Kështu, pjesë e epidofit është edhe Shkreli, i cili vite më parë bleu po ashtu një kompani farmaceutike që më pas e rriti çmimin e ilaçit që prodhohej nga ajo kompani në disa qindra për qind.
“Tani një emër famëkeq, Martin Shkreli është yll i episodit ‘Drug Short’. Ky episod hulumton lakminë e farmaceutikëve të mëdhenj, veçanërisht kompaninë ‘Valeant’. I fokusuar në të hyrat e saj, kompania mbylli departamentet e saja të hulumtimeve dhe synoi të blinte kompani më të vogla dhe të rriste çmimet e produkteve të tyre”, shkruan mediumi “thetriangle”.
Në këtë episod, për Shkrelin thuhet gjithashtu se nuk është pjesë e peshqve të mëdhenj të kësaj industrie, megjithatë ka ndikuar që emri i tij të urrehet gjithandej SHBA-së.
