Kryesore

Shqipëria ngjitet në podiumin e Organizatës Botërore të Turizmit

               Publikuar në : 13:43 - 11/09/19 user tir

Për herë të parë Shqipëria është ngjitur në podiumin e Organizatës Botërore të Turizmit, në Shën Petersburg të Rusisë. Këtë e ka bërë të ditur vetë ministri i Turizmit dhe Mjedisit, Blendi Klosi, i cili është i pranishëm në këtë Asamble, për të parën herë në postin e zv. Presidentit të Asamblesë së përgjithshme për Evropën.

Në sesionin e 23-të të Asamblesë, Shqipëria prezanton ofertën e saj turistike, mes 148 shteteve anëtare nga gjithë bota.

“Shqipëria ngjitet për herë të parë në podiumin drejtues të Organizatës Botërore të Turizmit. Mbledhur në Shën Petersburg të Rusisë, Asambleja që po zhvillon punimet në ditën e saj të dytë, ka konfirmuar në postin e zëvendës Presidentit të Asamblesë së Përgjithshme për Evropën, ministrin e Turizmit dhe Mjedisit, Blendi Klosi. Kjo është hera e parë që Shqipëria mban një pozicion të tillë që prej anëtarësimit të saj në OBT, në vitin 1993.

Në podiumin drejtues të Asamblesë së organizatës me 148 shtete anëtare, Ministri Klosi drejton disa nga panelet e punimeve të organit më të lartë drejtues të Organizatës ku po diskutohen çështjet më të rëndësishme të industrisë turistike, si heqja e regjimit të vizave si shtysë për rritjen e turizmit, zhvillimi i tregjeve turistike, turizmi i natyrës, turizmi dhe edukimi profesional, si binome të pandara, si edhe tendencat e reja në zhvillimin e kësaj industrie”, shkruan ministri Klosi.

Kthehu
WhatsApp Denonco ne TT