Qeveria e Shqipërisë ka vendosur të hapë një ambasadë në kryeqytetin e Australisë, Kanberra. Këtë gjë e ka njoftuar Ministri në Detyrë për Evropën dhe Punët e Jashtme, Gent Cakaj, i cili është shprehur se rëndësia e këtij vendimi qëndron në rrafshin politik dhe diplomatik.
“Një lajm fantastik për diplomacinë e Shqipërisë. Më parë, marrëdhëniet diplomatike të Republikës të Shqipërisë me Australinë dhe disa prej vendeve të Azisë dhe Paqësorit janë mbuluar nga Ambasada në Pekin. Hapja e Ambasadës në Kanberra do të mundësojë intensifikimin e marrëdhënieve diplomatike, politike dhe ekonomike midis Shqipërisë dhe Australisë”, deklaron Ministri në Detyrë.
Më tej, Cakaj në postimin e tij në Facebook, shprehet se kjo Ambasadë do të ketë një funksion shumë të rëndësishëm edhe në ofrimin e shërbimeve konsullore për shqiptarët në Australi.
“Sipas pritjeve paraprake, Ambasada në Kanberra do të ofrojë afërsisht 4000-5000 praktika konsullore brenda një viti kalendarik. Pra, gjykuar nga rëndësia politike, strategjike, diplomatike e konsullore, hapja e Ambasadës së Shqipërisë në Kanberra të Australisë ka një peshë të patjetërsueshme”, shkruan Cakaj.
