Një video që po qarkullon me shpejtësi në rrjete sociale, ka kapur momentin kur një segment i tërë i një ure të sapondërtuar në provincën Sichuan të Kinës u shemb të martën, vetëm disa muaj pasi ishte hapur zyrtarisht për qarkullim.
Ura Hongqi, me një gjatësi prej 758 metrash dhe pjesë e një autostrade kombëtare që lidh brendësinë e Kinës me Tibetin, u shemb, pasi rrëshqitje të rënda dheu goditën zonën malore përreth, njoftuan autoritetet e qytetit Maerkang për agjencinë e lajmeve Reuters.
Pamjet tregojnë momentin kur ura shembet, me re pluhuri që ngrihen në ajër. Pamje të tjera tregojnë boshllëqe të mëdha në strukturë, ndërsa pjesë të rrugës vareshin mbi lumë, teksa ekipet e shpëtimit dhe inspektimit rrethuan zonën.
Policia kishte ‘mbyllur’ urën që të hënën pasdite, pasi ishte vënë re çarje në shpatet përreth dhe lëvizje të tokës, që paralajmëronin paqëndrueshmëri.
Sipas një deklarate të qeverisë lokale, të martën pasdite situata në mal u përkeqësua, duke shkaktuar rrëshqitje të tjera që sollën shembjen e urës dhe rrugës hyrëse.
Autoritetet kanë bërë me dije se nuk ka pasur raportime për të lënduar apo viktima. Ura Hongqi, e ndërtuar për të forcuar lidhjet ndërmjet Sichuanit dhe Rrafshnaltës Tibetiane, ishte përfunduar në fillim të këtij viti.
Pamjet promovuese të publikuara më herët nga kompania ndërtuese Sichuan Road & Bridge Group e kishin prezantuar si një arritje të rëndësishme inxhinierike. Hetimet për shkaqet e shembjes janë në zhvillim.
