Në një konferencë për shtyp me rastin e 100 ditëve të para të mandatit të dytë të Presidentit Donald Trump, zëdhënësja e Shtëpisë së Bardhë, Karolayn Leavitt, e përshkroi këtë periudhë si një “fillim historik” të presidencës, duke theksuar se Trump ka mbajtur premtimet e dhëna. Së bashku me Sekretarin e Thesarit, Scott Besent, ajo theksoi se ekonomia amerikane është në proces rilindjeje dhe se më shumë se 100 vende kanë hyrë në negociata pas vendosjes së tarifave nga administrata.
Trump pritet të nënshkruajë një urdhër ekzekutiv për tarifat mbi makinat, me synimin për të mbrojtur industrinë vendase. Sekretari i Thesarit deklaroi se tarifat synojnë të gjenerojnë të ardhura afatgjata dhe të përshpejtojnë arritjen e marrëveshjeve tregtare, duke përmendur përparime me Indi, Korenë e Jugut dhe Japoninë. Lidhur me Kinën, ai deklaroi se vendi mund të humbasë miliona vende pune për shkak të tarifave.
Leavitt kritikoi publikisht Amazon për vendimin që të shfaqë koston e tarifave pranë produkteve të veta, duke e quajtur veprimin “politik dhe armiqësor”. Ajo aludoi edhe për bashkëpunim të mundshëm të kompanisë me propagandën kineze.
Ndërkohë, administrata Trump po përgatit një projektligj të ri fiskal për të nxitur investimet e brendshme dhe të huaja në SHBA. Sekretari i Thesarit theksoi rëndësinë e kthimit të fabrikave në vend dhe ofroi lehtësira në shpenzimet kapitale, energji të lirë dhe siguri rregullatore.
