Negociatorët po punojnë për një marrëveshje që do të shmangte rifillimin e sulmeve dhe do të hapte rrugën për diskutime mbi programin bërthamor iranian.
Shtetet e Bashkuara dhe Irani mund të jenë pranë një marrëveshjeje për zgjatjen me 60 ditë të armëpushimit mes dy vendeve, në një përpjekje për të shmangur rikthimin e konfliktit dhe për të hapur negociata mbi programin bërthamor iranian.
Lajmi është raportuar nga Financial Times, i cili citon burime diplomatike të përfshira në ndërmjetësim.
Sipas raportimit, draft-marrëveshja parashikon jo vetëm zgjatjen e armëpushimit, por edhe hapa konkretë për uljen e tensioneve në rajon, përfshirë rihapjen graduale të Ngushticës së Hormuzit, një prej korridoreve më të rëndësishme për transportin global të naftës.
Po ashtu, palët pritet të diskutojnë mënyrat për reduktimin ose dorëzimin e rezervave iraniane të uraniumit të pasuruar në nivele të larta, një nga çështjet më të ndjeshme në negociatat mes Teheranit dhe Uashingtonit.
“Marrëveshja duket se po shkon në drejtimin e duhur. Tani është në duart e amerikanëve për shqyrtim”, tha një diplomat për Financial Times.
Sipas të njëjtit burim, Irani mund të jetë i gatshëm të bëjë më shumë lëshime në lidhje me energjinë bërthamore, por jo për sa kohë lufta vazhdon.
“Ky draft ndihmon në ngushtimin e hendekut mes palëve”, shtoi diplomati.
Raportohet se ndërmjetësit kanë qenë në kontakt të vazhdueshëm me të dërguarin amerikan Steve Witkoff gjatë bisedimeve me delegacionin iranian të drejtuar nga Mohammad Bagher Ghalibaf.
Ndërmjetësit shpresojnë që kushtet e marrëveshjes të bindin presidentin amerikan Donald Trump të mos rifillojë sulmet ndaj Iranit, pas paralajmërimeve të fundit të Uashingtonit për mundësinë e një përshkallëzimi të ri ushtarak.
Zhvillimet vijnë në një moment kritik për rajonin, ndërsa tensionet mes SHBA-ve, Iranit dhe aleatëve të tyre mbeten të larta pavarësisht armëpushimit të përkohshëm.
