Pas pothuaj dy dekadash, aeroportet amerikane nuk do t’u kërkojnë më pasagjerëve të heqin këpucët gjatë kontrolleve të sigurisë.
Lajmi u bë i ditur të martën nga Sekretarja e Sigurisë Kombëtare, Kristi Noem, e cila njoftoi se politika e re ka hyrë në fuqi menjëherë në të gjithë Shtetet e Bashkuara.
Sipas saj, megjithëse kontrolli shumështresor i pasagjerëve do të vazhdojë, teknologjia moderne ka bërë të mundur eliminimin e këtij procesi jopopullor.
“Teknologjia jonë e sigurisë ka evoluar. TSA ka ndryshuar,” u shpreh Noem në një konferencë për shtyp.
Ajo shtoi se qasja e re përfshin të gjithë qeverinë dhe është dizenjuar për të rritur sigurinë, por edhe për ta bërë përvojën në aeroport më të këndshme për qytetarët.
Megjithatë, udhëtarët do të duhet ende të heqin rripat, palltot dhe të nxjerrin laptopët e lëngjet nga çantat, të paktën për momentin, pasi edhe këto rregulla janë nën shqyrtim.
Disa aeroporte si ai i Filadelfias, Cincinnati/Kentucky Verior dhe Piedmont Triad në Karolinën e Veriut kishin nisur zbatimin e politikës së re para se të bëhej zyrtare.
Më parë, vetëm pasagjerët me TSA PreCheck dhe fëmijët kishin përjashtim nga kjo kërkesë.
Rregulli për heqjen e këpucëve ishte vendosur pas tentativës së dështuar të Richard Reid, i njohur si “bombarduesi i këpucëve”, i cili kishte fshehur eksplozivë në këpucë gjatë një fluturimi nga Parisi për në Miami në dhjetor të vitit 2001.
Rregullorja u përforcua më tej nga klima e pasigurisë pas sulmeve të 11 shtatorit të po atij viti.
Grupi tregtar “Linjat Ajrore për Amerikën” përshëndeti ndryshimin, duke theksuar se masa do të lehtësojë procesin e udhëtimit për miliona pasagjerë në të gjithë vendin.
