Marrë shkas nga situata në veri, kryeministri i Kosovës, Albin Kurti, ka thënë se faktori ndërkombëtar nuk duhet ti mbyllë sytë para nxitjes së Serbisë. Kurti foli para mediave në Shkup, ku po merr pjesë në forumin socio-ekologjik. Ai u shpreh se Policia e Kosovës ka dëshmuar profesionalizimin e tyre dhe korrektësinë.
“Është për të ardhur keq që grupe të ndryshme kriminale në Veri të Ibrit, por gjithnjë të nxitura dhe të mbështetura nga Serbia, vazhdojnë ta kundërshtojnë sundimin e ligjit, rendin dhe sigurinë publike, duke sulmuar institucione të shtetit të Kosovës. Policia e Kosovës në vazhdimësi është dëshmuar për profesionalizmin dhe korrektësinë e saj”, tha Kurti në kuadër të Forumit socio-ekologjik në Shkup.
“Qytetarët të ruajnë qetësinë, meqenëse individë e grupe kriminale nuk mund të ngadhënjejnë mbi shtetin tonë, ndërkaq bashkësia ndërkombëtare, faktori ndërkombëtar do të duhej të mos i mbyllnin sytë para nxitjes që bën regjimi autokrat në Serbi ndaj qytetarëve të caktuar të Kosovës, që ta luftojnë dhe kundërshtojnë shtetin tonë”, tha më tej Kurti.
Serbia vijon të tensionojë situatën në veri të Kosovës, duke kërcënuar në mënyrë të drejtpërdrejtë me luftë.
Regjimi i Vuçiçit ka dërguar gjatë 48 orëve të fundit avionë dhe helikopterë për të patrulluar pranë pikës kalimit kufitar të Jarinjës në veri të Kosovës, si një formë kërcënimi ndaj kësaj të fundit.