Operacioni Forca e Ligjit (OFL), nuk ka të ndalur me sekuestrimet e aseteve të personave të dyshuar si kontingjent kriminal. Policia e Shtetit madje këtë e demostron me anë të pamjeve të super-aksionit të operacionit “Forca e Ligjit”, për goditjen e krimit të organizuar. Në video, shihen efektivët e “Anti-KÇK”, të mbërthyer me armë të rënda, si dhe të mbuluar me kapuça.
A e dini se sa vite vite burg do bëjnë ‘të fortët’ që nuk ‘lirojnë’ pasurinë e sekuestruar? Për të shmangur ‘qarkullimin’ e tyre rrotull pronave të konfiskuara me vendim gjykate, qeveria propozon burg nga 3-7 vjet. Ndërhyrja parashikohet në nenin 287 të kodit penal, si pjesë e paketës të ndryshimeve ligjore anti-KÇK, raporton A2.
Pjesë e paketës është dhe kodi i procedurës penale. Në një dispozitë kalimtare që parashikohet t’i shtohet ligjit, i cili kërkon minimalisht 84 vota për t’u miratuar, sqarohet se të gjitha provat materiale për të cilat gjykata mund të ketë harruar të shprehet kur ka dhënë vendimin për veprën penale, i kalojnë shtetit. Kryesisht bëhet fjalë për makina apo sende të tjera personale në pronësi të individëve kur arrestohen.
Janë 6 ligjet e paketës anti-KÇK që pritet të kalojë në qeveri e më pas në Kuvend. Sipas ndryshimeve në këto ligje, i jepet më shumë kompetencë Ministrisë së Brendshme, në varësi të së cilës kalon dhe agjencia që administron pronat e krimit.
Operacioni “Anti-KÇK”, ka marrë vëmendjen e publikut me ftesat për justifikim të pasurisë, që u dërgon personave me të shkuara kriminale.
