Rregullat e reja/ Ja si do të udhëtohet me taksi nga dita e hënë

Nga data 27 prill, pritet që të rifillojnë shërbimi me taksi. Por lëvizja e qytetarëve duhet të bëhet sipas disa rregullave, duke nisur nga higjiena dhe mbajtja e distancës. Drejtoria e Përgjithshme e Shërbimit të Transportit Rrugor, ka nxjerrë udhëzimin se si do të lëvizet me taksi duke filluar nga e hëna.

Për të udhëtuar me taksi, si shoferi dhe pasagjeri, duhet të respektojnë protokollet e sigurisë lidhur me situatën e koronaviorusit. Shoferi dhe pasagjeri duhet të jenë të pajisur me maska, doreza dhe dezinfektant.

Me mjaft rëndësi është që të shmangen kontaktet fizike. Lejohet vetëm 1 klient në automjet. Po kështu, pasagjeri duhet të ulet mbrapa dhe diagonalisht me shoferin e mjetit.

Kondicioneri duhet të jetë i fikur dhe ajrosja të jetë natyrale.

Udhëzimi i plotë

Nga data 27 Prill, do të rifillojnë shërbimet me taksi vetëm për lëvizjet brenda qytetit! Shoferë dhe pasagjerë duhet të respektojnë masat dhe protokollet e sigurisë të ndërmarra në situatën e emergjencës COVID-19!

Si të udhëtojmë të sigurt me taksi?

Shoferi dhe pasagjeri duhet të jenë të pajisur me maska, doreza dhe dezinfektant! Të shmangen kontaktet fizike!

Pasagjeri duhet të ulet mbrapa dhe diagonalisht me shoferin e mjetit. Lejohet vetëm 1 klient në automjet. Përjashtim rastet nga e njëjta familje dhe të shoqërimit me të mitur apo persona me paaftësi!

Kondicioneri duhet të jetë i fikur dhe ajrosja të jetë natyrale. Dritaret e mjetit të qëndrojnë pakëz hapur!

Mbuloni gojën dhe hundën me një pecetë ose bërryl kur kolliteni apo kur teshtini. Shmangni prekjen e syve, hundës ose gojës me duar të palara.

Pas pagesës me kartë/cash, shoferi dhe pasagjeri duhet të dezinfektojnë duart.

Pas çdo pasagjeri, shoferi të dezinfektojë: timonin, dorezat e dyerve të mjetit, sediljet, rripat e sigurimit, kontrollet e dritareve, butonin e bagazhit, etj.