Rinas, greva e kontrollorëve bën të pamundur uljen e avionëve

Kontrollorët e trafikut ajror në Rinas kanë vijuar grevën edhe ditën e sotme duke sjellë mbylljen e kullës së vrojtimit. Për pasojë është bërë e pamundur ulja e avionëve në pistë.

Një avion pasagjerësh që vinte nga Greqia ka qëndruar në pritje rreth 30-minuta mbi aeroport dhe për shkak pamundësisë për ulje është detyruar të kthehet drejt destinacionit nga ishte nisur.

Në aeroport pritet të shkoj dhe vetë ministrja e Infrastrukturës, Belinda Ballaku, për të negociuar me kontrollorët për rinisjen e punës. Ndërkohë kontrollorët nga ana e tyre kanë hartur një plan me 5 pika, realizimi i të cilave sipas tyre do të zhbllokojë ngërçin e krijuar.

Kërkesat e kontrollorëve:

Rikthim i kolegëve në punë

Shfuqizim i vendimeve të bordit

Rikthimi i pagës së plotë sipas kontratës kolektive

Transparencë financiare e plotë për vitin 2020

Një anëtar sindikate të jetë anëtarë bordi

Kujtojmë se ditën e djeshme 60 kontrollorë të Albkontroll në Rinas hynë në grevë për shkak të pushimit nga puna të 5 kolegëve të tyre dhe uljes së pagave. /faxweb/