Në mbledhjen e kësaj të marte, më 11 nëntor, bashkëkryetari i Komisionit të Posaçëm për Reformën Territoriale, Arbjan Mazniku, ka bërë një propozim: që anëtarë të këtij komisioni të zbresin në terren për dëgjesa.
“Një kërkesë që do vinte për mbledhjen e radhës është që në dy ose tre faza të diskutimeve publike, unë besoj që do të ishte e udhës që anëtarë të komisionit, jo të gjithë, por në grupe dyshe e treshe, të kemi mundësinë të lëvizim në territor dhe të bëjmë dëgjesa drejtpërdrejt vetë, në zona të ndryshme, me grupe të ndryshme të territorit, në mënyrë që të prekim deri diku drejtpërdrejt si anëtarë të komisionit problematikat. Qofshin njësitë e pushtetit vendor, qofshin qytetarët tanë në raport me pushtetin vendor, dhe të kemi mundësinë t’i raportojmë në mënyrë të qenësishme.
Kështu që unë do kisha shumë dëshirë që ky komision të ishte në fakt më shumë se një grup pune, një vend ku ne të kemi një punë të prekshme, diskutime të qenësishme, të hapura dhe të shohim të gjitha opsionet e mundshme, dhe të synojmë për të gjetur zgjidhjet më të mira.”, tha Mazniku.
Kjo është mbledhja e parë e këtij komisioni, që po mbahet pa praninë e deputetëve të Partisë Demokratike. Deputeti socialist Arbjan Mazniku, gjatë fjalës së tij, tha se objektivi final “është që të krijojmë një reformë ku të sigurohemi që të kemi institucione të afta, efikase dhe demokratike”.
Më tej, sa i përket qeverisjes vendore, Mazniku u shpreh se bashkitë në vend kanë funksionuar në mënyrë efektive.
