Vizita e kryeministrit Edi Rama në Ankara, ka shkaktuar reagim te mediat greke, të cilat shkruajnë se Shqipëria është kthyer në një gurë shahu të lojës së madhe gjeopolitike të Turqisë në rajon.
Sipas medias në vendin fqinj, Newsbreak, kjo lidhet me çështjen e detit midis Shqipërisë dhe Greqisë, dhe se vendi ynë po nxjerr pengesa për një marrëveshje të mundshme.
Edhe pse pak kohë më parë qeveria greke u shpreh se ujërat territoriale do të zgjerohen me 12 milje, dhe se çështja e detit do të gjykohet në Gjykatën Ndërkombëtare, ende nuk dihet se kur do të zgjidhet ky proces.
Në artikull, media greke shkruan për një paralelizëm midis çështjes detare të dy vendeve, dhe atë të çështjes së ishujve grekë përballë Turqisë.
Portali i referohet edhe një deklarate të ministres së Mbrojtjes Olta Xhaçka në Euronews, sipas të cilës ajo nuk është e sigurt nëse çështja e detit me Greqinë mund të zgjidhej brenda mandatit të tretë qeverisës të socialistëve.
Greqia synon që zgjidhjen për çështjen e detit me Shqipërinë ta përdorë kundër Turqisë për disa ishuj në Egje.
