Kryeministri Edi Rama mbajti sot nga Washingtoni një bashkëbisedim me gazetarët shqiptarë, pas takimeve me Sekretarin e Shtetit, Antony Blinken.
Ai foli edhe për shpalljen “non grata” të paraardhësit të tij, Sali Berisha. Kreu i qeverisë, Edi Rama u shpreh se vendime të tilla merren me procese të mirëpërcaktuara, dhe nuk kanë asnjë lidhje me faktorë të jashtëm. Rama pohoi se shpallja “non grata” e Sali Berishës është meritë 100% e tij.
“Me Sekretarin e Shtetit kemi prekur të gjitha temat e paracaktuara për t’u diskutuar, që janë gjitha temat e bashkëpunimit tonë me SHBA.
Sa i përket nivelit, mendoj që ne kemi ditur në këto vite të ndërtojmë mbi bazën e mëparshme dhe ta çojmë politikën e jashtme në një nivel tjetër. Kjo është meritë e të gjithë atyre, që bashkë me mua, kanë kontribuar në këtë përpjekje. Në arenën ndërkombëtare, Shqipëria është vendosur në nivel krejt tjetër.
Shpallja “non grata” e Sali Berishës është meritë 100% e Sali Berishës, nuk ka diskutim. SHBA thjesht e kanë konfirmuar me vendimin e tyre, meritën e tij, për të gjitha ato, për të cilat ata e kanë shpallur “non grata”.
Të thuash që qeveria e SHBA mund të influencohet nga faktorë të jashtëm për vendime të kësaj natyre, do të thotë faktikisht të akuzosh SHBA se janë shtet pa dinjitet, pa seriozitet, pa integritet, dhe se kanë një qeveri që korruptohet për qëllime të të tretëve. Kjo është absolutisht diçka jashtë realitetit.
Këto janë vendime që merren me procese të mirëpërcaktuara dhe nuk kanë asnjë lidhje me faktorë të jashtëm. Nëse SHBA do të loboheshin e influencoheshin kaq kollaj, do të ishin prej vitesh peng i diktaturave dhe regjimeve që kanë pasurira marramendëse.
Por, kjo nuk ka ndodhur dhe nuk ka si të ndodhë. Është e gjitha një farsë për të ardhur keq dhe akoma më keq është për ata që besojnë marrëzi të tilla”, tha kryeministri Rama.
