Ish-kreu i PD, Lulzim Basha ka reaguar ashpër ndaj akuzës së Sali Berishës se Edi Rama dhe Lulzim Basha janë bashkë në aferën e Portit të Durrësit. Në një postim në rrjetet sociale, Basha ka deklaruar se është Berisha që ka në dorë të gjitha benefitet e lejeve dhe koncensioneve që ka dhënë qeveria e tij.
“Sa herë do të fshehë diçka, non grata hap thesin e mashtrimeve dhe shpifjeve. Trekëndëshi i Bermudës është i pandarë në korrupsion, lidhje me krimin dhe minim të demokracisë. E vërteta është e thjeshtë: Bashkë i kanë oligarkët dhe mediat, lejet, kullat, koncesionet e tenderat, bandat dhe policët e gjyqtarët e korruptuar”.
Në një deklaratë për mediat, ish-kryeministri Sali Berisha akuzoi Lulzim Bashën se ka 60% të aksioneve në Portin e Durrësit së bashku me kryeministrin Edi Rama.
“Ky monizëm nuk ka të ndalur, aferat e tmerrshme të Edi Ramës janë unike në botë. Pasi ka vjedhur 420 milionë euro me firmën e tij për ndërmarrjen e tij të djegësve, vërsulet i tërbuar për të vjedhur 1 milion metër katror tokë në një sipërmarrje, shumë shpejt do e njihni, me dokumente false. 60 përqind të aksionerëve janë Edi Rama dhe Lulzim Brava dhe mafiozët e tyre. Po organizojnë në Durrësin e Shqipërisë vjedhjen më të tmerrshme në histori”, tha Berisha.
