Opozita ka bojkotuar mbledhjen e sotme të Këshillit Politik që ishte thirrur në orën 12:00. Shkak është bërë pasi opozita nuk ka pranuar diskutimet mbi draftin e paraqitur ne Këshill nga mazhoranca.
Përfaqësuesi i PD në Këshillin Politik, Oerd Bylykbashi, tha se i kanë dërguar një kërkesë zyrtare PS për t’ju drejtuar OSBE/ODIHR-it.
“Çështja që koalicionet që të ruhen siç janë, nuk lëvizim pa marrë një përgjigje nga OSBE/ODIHR.
Ne kemi bërë një kërkesë zyrtare dhe presim përgjigje sapo Gjiknuri të vendosë. Brenda ai tha që nuk jemi dakord që t’i drejtohemi ODIHR-it. PS po bojkoton marrëveshjen e 14 janarit”, tha Bylykbashi.
Në tryezë përfaqësuesit e opozitës së bashkuar kanë depozituar një dokument, që i kërkon mazhorancës për dy çështjet që bëhet debati; për formulën e koalicioneve dhe listave të hapura. Opozita deklaronte se do t’i drejtohej zyrtarisht OSBE-ODHIR për asistentë, lidhur me këto dy çështje ku është hasur ngërçi.
Pas depozitimit të këtij dokumenti, mazhoranca ka kërkuar që të vijojë diskutimi me draftin e saj, ndërsa opozita ka deklaruar se pa u marrë mendimi i OSBE nuk mund të vijojë diskutimi.
