Presidentja e Kosovës, Vjosa Osmani është operuar sot, gjatë orëve të para të mëngjesit, pasi ka pasur probleme me tëmthin. Ndërhyrja është kryer në një spital privat të quajtur “Aloka”.
Vjosa Osmani vijon të qëndroj e shtrirë në spitalin privat “Aloka”, ku i është nënshtruar një intervenimi të lehtë kirurgjik (heqja e tëmthit), i cili sipas Presidencës është realizuar me sukses.
Sipas kirurgëve të QKUK-së, operacioni për heqjen e tëmthit është një procedurë rutinë që kryhet në Klinikën e Kirurgjisë Abdominale që nga viti 1999, me përqindje të suksesit 99.9 për qind.
18 kirurgë kanë reaguar duke shprehur indinjatën e tyre për anashkalimin e institucionit publik, në këtë rast Klinikës së Kirurgjisë Abdominale në QKUK, nga presidentja Osmani.
Për këtë rast ka reaguar edhe këshilltari i ish-presidentit Hashim Thaçi, Artan Behrami, i cili ka publikuar një fotografi ku në prill të vitit 2020, Thaçi i ishte nënshtruar një operacioni në QKUK.
Thaçi ishte shtrirë në Klinikën e Urologjisë në QKUK, pas një problemi shëndetësorë që kishte me gurët në veshkë.