Në kohën kur pandemia ka shkaktuar një plagë të madhe në mbarë botën, duke sjellë çdo ditë bilance tragjike, një lajm i mirë vjen në lidhje me vaksinat. Pak ditë më parë, kërkuesit u shprehën entuzistë se ata ishin drejt prodhimit të vaksinave, pasi kishin rezultuar efikase.
Presidentja e Komisionit Evropian, Ursula von der Leyen, ka konfirmuar se grupet e para të rrezikut në Evropë, do të jenë vaksinuar deri në fund të muajit dhjetor.
Në një deklaratë që ka bërë në Parlamentin Evropian, ajo ka folur për sigurimin e një kontrate me gjashtë kompani vaksinash.
“Më në fund ka dritë në fund të tunelit. Komisioni Evropian tani ka siguruar kontrata me gjashtë kompani. Qytetarët e parë evropianë mund të jenë vaksinuar tashmë para fundit të dhjetorit”, ka thënë Ursula von der Leyen.
Ajo ka apeluar se shtetet anëtare duhet të përgatiten që tani për marrjen e e vaksinave, për të mposhtur virusin vdekjeprurës.
“Shtetet anëtare duhet të përgatiten logjikisht për marrjen e qindra miliona dozave. Sepse kjo është bileta jonë, si mënyra e vetme për të dalë nga pandemia”, tha ajo.