Përplasja Mourinho-Pogba, portugezi: Profesionisti më i madh që kam punuar

Paul Pogba dhe Jose Mourinho kanë pasur një krisje mendimesh gjatë një ndeshje futbolli dhe kjo ka bërë që mediat britanike të shkruajnë shumë për atmosferën tek United. Por në daljen për mediat para ndeshjes së fundjavës, ku Manchester do të përballet me Neëcastle United të Rafa Benitezit, ai ka pohuar se Pogba është një profesionist i vërtetë dhe se është e vështirë që të gjendet një lojtar më profesionist se mesfushori francez.

“Ai ka një sjellje shumë profesionale. Kjo javë ka qenë si të gjithë të tjerat, ai ka punuar mirë dhe pëlqen të stërvitet. Kurrë nuk kam pasur ndonjë problem me të, gjatë javës së fundit qeshi duke lexuar disa gjëra”.

“Pogba është një mesfushor, ai nuk është i majtë dhe nuk është sulmues. Kur njerëzit më pyesin për pozitën më të mirë, them mesfushor, por varet nga sistemi, por gjithmonë është një mesfushor. Mes Pogbas dhe meje nuk ka konfuzion, është e vështirë të gjesh një mesfushor me më shumë potencial sesa Pogba”, tha trajneri portugez.

Strategu ka folur edhe për gjendjen shëndetësore të mbrojtësit të krahut të majtë, Luke Shaw. “Ai nuk ka pasur lëndime gjatë muajve të fundit, e cila ka bërë të ketë përparim dhe jam shumë i lumtur. Shaw ka një kontratë të re dhe mund të vazhdojë të jetë lojtar i Manchester Unitedit”, pohoi Jose.